Зусім мала часу застаецца да пачатку прамых перамоў беларускага лідара з Прэзідэнтам Зімбабвэ ў Мінску ў Палацы Незалежнасці. Эксперты, аналізуючы цяперашні стан спраў у адносінах дзвюх краін, гавораць пра выхад на стратэгічны ўзровень партнёрства. Дарэчы, стратэгічным называе візіт і зімбабвійскі бок. Гэтая рэспубліка ў Паўднёвай Афрыцы зараз перажывае складаны этап новай індустрыялізацыі і "зборкі дзяржавы" пасля цэлай серыі палітычных і эканамічных крызісаў, а таму ёй патрэбна надзейная палітыка-эканамічная апора, у тым ліку ў Еўропе. Якія прыярытэты ставіць перад сабою беларускі бізнес і дыпламатыя ў Зімбабвэ, на што абапіраюцца эксперты ў сваім аналізе і якія вынікі перамоў на вышэйшым узроўні чакаюць у дзвюх краінах.
Спытаем у нашага палітычнага аглядальніка Андрэя Крывашэева. Ён з намі на прамой сувязі з Палаца Незалежнасці.
Ацэнкі, якія вы агучылі, сапраўды маюць пад сабою ўсе падставы. Пачну з таго, што тут, у Палацы Незалежнасці, мы чакаем старту перамоў на вышэйшым узроўні ў рамках першага, падкрэслю, першага, афіцыйнага візіту Прэзідэнта Зімбабвэ ў Беларусь. Пры гэтым асабісты дыялог дзеючых кіраўнікоў дзяржаў ужо другі. Лідары сустракаліся 4 гады назад, але тады высокі госць займаў пасаду першага віцэ-прэзідэнта.
Дарэчы, менавіта з тых часоў, і тых, безумоўна, паспяховых перамоў можна адлічваць новы этап у адносінах дзвюх краін. Некалькі лічб і фактаў у пацверджанне. Калі на працягу двух дзесяцігоддзяў наш тавараабарот у асноўным вагаўся ў дыяпазоне ад 2 да 5 мільёнаў долараў, нікчэмная ў маштабах дзяржавы сума, то ў 2017 годзе гандаль пераваліў за 20 мільёнаў. Хоць і гэта не паказчык.
Летась бакі падпісалі тры сур'ёзныя кантракты на пастаўку беларускай тэхнікі і абсталявання на агульную суму каля 60 мільёнаў долараў. Галоўныя пазіцыі - гэта камбайны, грузавікі, трактары і спецыяльная тэхніка. Акрамя таго, сёння дадаткова прапрацоўваюцца кантракты БелАЗа, Амкадора і шэрагу сельгасвытворцаў. Прычым апошнія гатовыя ўвайсці на рынак з тэхналогіямі - г.зн. будаваць агракомплексы з перапрацоўкай пад ключ. Згадзіцеся, гэта ўжо цалкам іншы ўзровень супрацоўніцтва.
Крытыкі адзначаюць, што нават такі вынік - вельмі сціплы. І збольшага яны маюць рацыю. Дыпламатычныя адносіны былі ўсталяваныя ў далёкім 1992 годзе. Але трэба ўлічыць, што за 2,5 дзесяцігоддзі Рэспубліка Зімбабвэ перажыла цэлую серыю разбуральных палітычных і эканамічных крызісаў. Спакой, і то адносны, усталяваўся толькі 2 гады назад, як раз пасля абрання дзеючага Прэзідэнта. Вопытны юрыст, палітык і кіраўнік аб’явіў курс на новую індустрыялізацыю, адкрытасць эканомікі і буйныя інфраструктурныя праекты. Партнёрам гэтага курсу з улікам высокага ўзаемнага даверу лідараў як раз і выступае Беларусь.
На новым этапе мы прапаноўваем буйныя сумесныя праекты ў энергетыцы, сельскай гаспадарцы, лагістыцы, разведцы і здабычы карысных выкапняў. Дарэчы, Зімбабвэ - гэта проста скарбніца найкаштоўнейшых рэсурсаў у Афрыцы - тут і рэдкія металы, і золата, і жалезная руда з брыльянтамі. У беларусаў у гэтым сэнсе ўжо ёсць рэпутацыя - у кар'ерах працуюць нашы БелАЗы, а нядаўна наша складанае абсталяванне купілі для мадэрнізацыі вытворчасці па апрацоўцы брыльянтаў.
Акрамя таго, Зімбабвэ разлічвае ў кароткі тэрмін вярнуць сабе статус "жытніцы" Паўднёвай Афрыкі - і вопыт Беларусі тут як нельга дарэчы. Плюс, як адказныя партнёры мы прапаноўваем навучаць студэнтаў з Зімбабвэ ў лепшых беларускіх ВНУ і дапамагчы ў станаўленні сістэмы прафесійна-тэхнічнай адукацыі. А гэта дэфіцытныя кадры для новай індустрыялізацыі і лекі ад беспрацоўя, якая рэгулярна штурхае паўднёваафрыканскую рэспубліку да новых крызісаў і хваляванняў.
Безумоўна, ад сённяшняй сустрэчы прэзідэнтаў мы чакаем новых кірункаў супрацоўніцтва і замацавання на паперы ўжо прапрацаваных міністэрствамі і ведамствамі пагадненняў.
Паводле самых сціплых ацэнак, у бягучым і наступным годзе ў інвестыцыях, гандлі і сферы паслуг краіны могуць патроіць суму кантрактаў і дагавораў.
