І гэта зразумела, бо Кіраўнік дзяржавы агучыў асноўныя кірункі руху краіны на год наперад. Калі хочаце, гэта дарожная карта развіцця Беларусі. Сёння ў "Панараме" мы асобна закранём тактычныя задачы ў сацыяльнай сферы, эканоміцы і навуцы. Пачнём з галоўных тэзісаў выступлення Прэзідэнта.
Вольга Макей сабрала меркаванні спецыялістаў і эксклюзіўныя каментарыі. Краіна, чалавек, развіццё, эканоміка - гэтыя словы ў Пасланні Прэзідэнта гучаць часцей за ўсё. Цікава, калі правесці аналіз тэксту, то больш за іншыя ўжывалася слова "год" - паўсотні разоў. Сапраўды, для Беларусі 2016 - год іспытаў, пра гэта Аляксандр Лукашэнка гаворыць адразу.
Улада пакажа, на што здольная ў пераадоленні цяжкасцей. А беларусы прадэманструюць згуртаванасць - менавіта такі шырокі сэнс у 2016 як Года культуры. Яшчэ адзін іспыт чакае парламентарыяў падчас выбарчай кампаніі - такое выпрабаванне палітычнай культуры грамадства.
Канкрэтныя задачы Прэзідэнт ставіць перад беларускай эканомікай. Па-першае, гэтае зніжэнне выдаткаў на вытворчасць, як вынік - і змяншэнне сабекошту прадукцыі на чвэрць. 25 % - лічба сур'ёзная, але дасягальная, каменціруюць спецыялісты.
Імпартазамяшчэнне і інавацыі - гэта яшчэ два вагоны да эканамічнага лакаматыва. Упэўнена рухацца наперад па рэйках канкурэнцыі можна толькі ствараючы свой унікальны тавар.
Даручэнне ўраду - штогод нарошчваць імпартазамяшчальную прадукцыю мінімум на 600 мільёнаў долараў. Пры гэтым акцэнт на стварэнне праектаў будучыні. Як прыклад - космас і ядзерная энергетыка. Выкарыстоўваць мірны атам можна і для стварэння кластара энергаёмістых вытворчасцяў.
З такой задачай справяцца, упэўнены Аляксандр Міхалевіч. Распрацоўшчык канцэпцыі энергетычнай бяспекі Беларусі ўжо падлічыў, наколькі выгадна такая энергетычная дыверсіфікацыя.
А вось і ежа для розуму: эканамічны блок Паслання можна звесці да формулы 3Д - гэта дэнамінацыя, дэдаларызацыя і дыверсіфікацыя плюс правіла 3І - гэта інавацыі, імпартазамяшчэнне і інвестыцыі. Толькі пры наяўнасці ўсіх гэтых складальнікаў пасля знака роўна можна атрымаць эфектыўную эканоміку. Пры гэтым эфектыўнай павінна быць і занятасць.
Вось свежы прыклад. У Беларусі з'явілася новая вытворчасць воданагравальнікаў. Ужо хутка тэхніку змогуць выпрабаваць у нашай краіне, далей экспарт як мінімум на рынак ЕАЭС. Гэта сумесны праект аднаго з найбуйнейшых холдынгаў Беларусі і кампаніі №1 у Кітаі па вытворчасці бытавой тэхнікі. Важны фактар - новая лінія, значыць новыя рабочыя месцы.
А гэта пацвярджаюць і рэйтынгі. У справаздачы Сусветнага банка "Вядзенне бізнесу 2016" па паказчыку "Падаткаабкладанне" Беларусь на 63 месцы сярод 189 дзяржаў. А за 5 гадоў прасунулася на 126 пазіцый уверх. Мэта - увайсці ў 30-ку, але гэтаму часам перашкаджаюць тыя, хто на беларускім бізнес-клімаце хоча нагрэцца.
Гаворачы пра гэта падчас Паслання, Прэзідэнт зрабіў адно з самых эмацыянальных адступленняў. Займацца бізнесам у сваіх інтарэсах, ігнаруючы дзяржаўныя, у Беларусі не выйдзе.
Праблемы ёсць і ў сферы, якая гарантуе харчовую бяспеку краіны. АПК: па выніках мінулага года кожнае чацвёртае сельгаспрадпрыемства - стратнае. Як выцягнуць гаспадаркі з пазыковай ямы і аздаравіць эканоміку сяла? Рэцэпт шукаюць ва ўрадзе.
Міхаіл Русы, намеснік прэм'ер-міністра Беларусі: "У нас падрыхтаваны 2 праекты. Гэта стварэнне агенцтва, дзе праблемныя крэдыты - даць прадпрыемству магчымасць задыхаць, абнуліць. Далей яны павінны думаць, як мы будзем жыць. Другі ўказ - фінансавае аздараўленне. Мы там распісваем усю метадалогію, як правесці аздараўленне, даючы магчымасць адпрацаваць шляхі выхаду. Мы там распісваем, як прыцягнуць інвестара, як буйному прадпрыемству аб'яднацца і пачаць вытворчасць. Праект указа ўзгоднены, дапрацоўваецца, будзе даложана Кіраўніку дзяржавы".
Цяжкасці эканомікі, пытанні зарплат і пенсій, удасканаленне сістэмы адукацыі. Гэта ўсе важныя тэмы, якія не абыходзяцца без самога галоўнага - бяспекі. Сёння мір застаецца галоўным здабыткам беларусаў.
Для гарантавання бяспекі ў краіне ўжо зроблена нямала. Новая ваенная дактрына, свежыя папраўкі ў закон, якія ўводзяць крымінальную адказнасць за экстрэмізм, удзел беларусаў у баявых дзеяннях за мяжой, пакараюць і за вярбоўку. Словам, на новыя выклікі - імгненная рэакцыя на заканадаўчым узроўні.
Пасланне Прэзідэнта - гэта своеасаблівая дарожная карта развіцця Беларусі на год наперад, кірункі руху зададзеныя для кожнай галіны. Да чаго прыйдуць - абавязкова спытаюць. Але ўсё ж галоўнае мерапрыемства, якое чакае краіну ў найбліжэйшай перспектыве, - Усебеларускі народны сход. Ён стане ўжо доўгатэрміновай стратэгіяй развіцця.
Безумоўна, тэзісы, агучаныя ўчора падчас Паслання народу і парламенту, яшчэ доўга будуць абмяркоўваць прадстаўнікі самых розных сфер. Студыя Белтэлерадыёкампаніі ўжо сабрала эканамістаў, палітолагаў, дэпутатаў, прадстаўнікоў бізнесу і кіраўнікоў прадпрыемстваў, каб выслухаць самыя розныя меркаванні. Усё гэта ўжо ў спецыяльным выпуску ток-шоу "Форум" з Дзмітрыем Бачковым.
