Прэзідэнт сустрэўся з гендырэктарам Сусветнай арганізацыі інтэлектуальнай уласнасці

У сучасным свеце залог паспяховага развіцця любых двухбаковых адносін - пашырэнне кааперацыйных сувязяў. А лепей, калі сумесны прадукт будзе высокатэхналагічным. Наша краіна ўзяла курс на развіццё сферы ІТ і ўкараненне інавацый у вытворчасці. Але любыя распрацоўкі павінны быць пад надзейнай абаронай.

Гэтымі пытаннямі ў глабальным маштабе займаецца Сусветная арганізацыя інтэлектуальнай уласнасці, з гендырэктарам якой сёння і сустрэўся наш Прэзідэнт. Пляцоўка аб'ядноўвае 192 дзяржавы. З самага пачатку - а гэта 1967 год - у іх ліку і Беларусь. Для Аляксандра Лукашэнкі гэта не першая сустрэча з кіраўніцтвам арганізацыі. Паміж Мінскам і Жэневай, дзе знаходзіцца штаб-кватэра САІУ, - цесныя кантакты. 

Галоўная мэта Сусветнай арганізацыі інтэлектуальнай уласнасці - ахова правоў на распрацоўкі ў розных сферах. Глабальная сістэма дазваляе атрымліваць ад розных дзяржаў інфармацыю аб вынаходствах, прамысловых узорах і таварных знаках. І як засведчыў Фрэнсіс Гары, Беларусь у аб'яднанні лічаць надзейным партнёрам. Па-першае, у свеце, дзе расце канкурэнцыя ў розных сферах, Беларусі ўдаецца захоўваць шматпалярны падыход. Таму нашай краіне давяраюць. Як пацверджанне гэтаму - жаданне САІУ праводзіць менавіта ў Мінску найбуйнейшыя міжнародныя мерапрыемствы ў сферы інтэлектуальнай уласнасці. Па-другое, наша краіна сваім прыкладам даказвае, як можна развіваць сферу высокіх тэхналогій і дамагчыся поспехаў. Гэты вопыт Сусветная арганізацыя лічыць вельмі каштоўным.

Усяго за мінулы год у Беларусі зарэгістравана больш як тры тысячы аб'ектаў прамысловай уласнасці - гэта распрацоўкі, карысныя мадэлі і новыя гатункі раслін. Беларусь плануе далучыцца да Гаагскага пагаднення аб міжнароднай рэгістрацыі прамысловых узораў. Што вельмі скароціць нашы выдаткі і будзе рэкламаваць беларускія тэхналогіі на ўвесь свет. Неўзабаве ў Беларусі з'явіцца цэнтр дасудовага ўрэгулявання пытанняў па абароне інтэлектуальнай уласнасці.