Развіццё міждзяржаўных адносін Беларусі і Ватыкана абмяркуюць сёння ў Мінску на самым высокім узроўні. Учора позна ўвечар у нашу краіну з афіцыйным візітам прыбыў дзяржсакратар Папы Рымскага Францыска кардынал П’етра Паралін. У нацыянальным аэрапорце высокага госця сустракала наша здымачная група.
Расказвае Наталля Тарасюк.
Самалёт прызямліўся амаль у прызначаны час - у чацвер у палову на дзясятую вечара. Такім чынам пачаўся афіцыйны візіт у нашу краіну другой пасля Папы Рымскага Францыска асобы ў Каталіцкай царкве – дзяржаўнага сакратара Ватыкана кардынала П’етра Параліна. Варта адзначыць, што гэта міждзяржаўны візіт. Менавіта сакратар - галоўны памочнік пантыфіка ў справах кіравання Святым Прастолам. Кардынал Паралін прадстаўляе апостальскую сталіцу на міжнароднай арэне, па сутнасці, ён міністр замежных спраў Ватыкана. Аднак у некаторых выпадках ён нават можа прадстаўляць асобу самога пантыфіка. На гэтую пасаду дзяржаўнага сакратара Папа Францыск прызначыў П'етра Параліна напрыканцы жніўня 2013 года. Кардынал прыступіў да сваіх абавязкаў ужо ў сярэдзіне лістапада. П’етра Паралін нарадзіўся на поўначы Італіі. Як прадстаўнік апостальскай сталіцы служыў у Нігерыі, Мексіцы. Пэўны час адказваў за адносіны з Іспаніяй, Андорай, Італіяй і Сан-Марына. У праграме візіту ў Беларусь - сустрэчы на самым высокім узроўні не толькі з прадстаўнікамі дзяржаўнай улады краіны, але і з кіраўніцтвам Каталіцкай і Праваслаўнай цэркваў.
Дзяржаўны сакратар – найбліжэйшы супрацоўнік Папы Рымскага. Кардынал Паралін прыме сёння ўдзел у закладцы сімвалічнага першага каменя на месцы будаўніцтва новага дыпламатычнага прадстаўніцтва Ватыкана ў Беларусі - апостальскай нунцыятуры. Сустракаючы кардынала, Мітрапаліт Мінска-Магілёўскі Тадэвуш Кандрусевіч асабліва падкрэсліў важнасць і значэнне гэтага візіту.
Кардынал прыме ўдзел і ва ўрачыстых набажэнствах. У суботу ён наведае начное чуванне моладзі ў Чырвоным касцёле. А раніцай у нядзелю ўзначаліць святую імшу з удзелам дзяцей у Мінскім архікафедральным касцёле імя Прасвятой Дзевы Марыі.
Візіт працягнецца тры дні. Афіцыйная праграма ў кардынала П’етра Параліна пачнецца ў пятніцу, 13 сакавіка. Нельга не заўважыць пэўны сімвалізм: дзяржаўны сакратар Ватыкана наведвае Беларусь менавіта ў дзень абрання на Святы Прастол кардынала Хорхе Марыа Берголья. 13 сакавіка спаўняецца два гады, як ён стаў Папам Рымскім Францыскам. Дарэчы, гэты дзень у Ватыкане – афіцыйны выхадны. І святары, і вернікі вельмі сур’ёзна ставяцца да гэтай даты. Аднак дзяржаўны сакратар Ватыкана, другая асоба пасля Папы Рымскага Францыска, у гэты дзень будзе знаходзіцца ў нашай краіне, у Беларусі.
