Традыцыйна, пасля завяршэння вялікага мерапрыемства падводзяцца вынікі і гучаць адзнакі. Спачатку лічбы: 7 дзён манеўраў, каля 13 тысяч вайскоўцаў, 350 адзінак бранятанкавай тэхнікі. Вучэнні атрымаліся сапраўды маштабнымі і насілі пры гэтым выключна абарончы характар, гэта падкрэслівалася неаднаразова. І менавіта таму манеўры зрабілі максімальна адкрытымі - назіралі за імі 3 дзясяткі ваенных аташэ з 20 краін свету. Кульмінацыйным днём вучэнняў стаў фінальны. Напярэдадні адразу на двух палігонах - каля Гродна і ў Калінінградскай вобласці - было па-сапраўднаму горача. Разыгрывалася некалькі тактычных эпізодаў, кожны быў максімальна набліжаны да рэальных умоў. За дзеяннямі армій назіралі два Вярхоўныя галоўнакамандуючыя - прэзідэнты Беларусі і Расіі Аляксандр Лукашэнка і Уладзімір Пуцін.
Аб Захадзе, які яшчэ больш зблізіў усход - рэпартаж Сяргея Хамянтоўскага.
13 тысяч салдат, 7 палігонаў, 2 краіны. Стратэгічныя вучэнні Захад-2013 ахапілі шэраг рэгіёнаў Расіі і вялікую частку Беларусі. Галоўная мэта: павысіць узровень ваеннага ўзаемадзеяння са стратэгічным саюзнікам - Расіяй. Аб тым, якое значэнне гэтым манеўрам надаюць у Мінску і Маскве, можна меркаваць па наступным факце - на актыўную фазу вучэння прыляцелі прэзідэнты Аляксандр Лукашэнка і Уладзімір Пуцін.
На Гожскім палігоне, паводле задумы вучэнняў, аб'яднаная групоўка саюзных сіл правяла контртэрарыстычную аперацыю. Адпрасаваўшы ўмоўных тэрарыстаў авіяцыяй, у бой уступіла асноўная ўдарная сіла сухапутных войскаў - артылерыя.
Канчатковую кропку ў ліквідацыі тэрарыстаў паставіў ваенны спецназ. Аперацыя на Гожскім палігоне ўразіла нават вопытных вайскоўцаў. Разам, паказаўшы сінхроннасць і зладжанасць, саюзная групоўка войскаў Беларусі і Расіі дэманструе вышэйшае майстэрства.
Дзве арміі на адным полі бою раўнапраўныя партнёры, аб'яднаныя адзінай мэтай - навучыцца плячо ў плячо адлюстроўваць любую знешнюю агрэсію. Сімвалічна, што на палігон Балтыйскага флоту Хмялёўка лідары дзвюх краін накіраваліся разам на адным самалёце.
Браты па зброі і на моры разам. Шчыт саюза выпрабавалі і ў акваторыі Балтыйскага мора.
На карце Калінінградскай вобласці населеных пунктаў стала больш. Вёскі Ярмолаўка і Трафімава пабудавалі на палігонах Балтыйскага флоту Хмялёўка і Праўдзінскі як раз да стратэгічных беларуска-расійскіх вучэнняў Захад-2013.
У вёсках, паводле легенды, размясціліся базавыя лагеры ўмоўных незаконных узброеных фарміраванняў. Загад - стварыць абстаноўку сучаснага гарадскога бою - вайскоўцы выканалі літаральна і адбудавалі цэлы жылы квартал са школамі і магазінамі. Марпехам Балтыйскага флота і віцебскім дэсантнікам трэба населеныя пункты вызваліць.
Калі ў былыя гады да сумесных ваенных манеўраў прыцягвалі сухапутныя часці і авіяцыю, то зараз да іх далучыўся Ваенна-марскі флот.
Мардовія - самы буйны ў свеце дэсантны карабель на паветранай падушцы класа Зубр. Менавіта з яго высаджваліся на ўзбярэжжа віцебскія дэсантнікі з 103-й брыгады. Судна можа перамяшчацца па зямлі, абыходзячы невялікія перашкоды і мінныя загароды, рухацца па балотах і высаджваць дэсант у глыбіні абароны праціўніка.
Беларускія блакітныя берэты ўпершыню высадзіліся на ўзбярэжжа з самага вялікага ў свеце дэсантнага карабля на паветранай падушцы. Падобныя сумесныя дзеянні ў акваторыі Балтыйскага мора для беларускай арміі ўпершыню. За аперацыяй уважліва сочаць два прэзідэнты.
На Балтыцы віцебскіх дэсантнікаў з 103 брыгады ўжо называюць марскімі пехацінцамі. Да Піцера блакітныя берэты дабіраліся воінскім эшалонам. Адтуль на вялікіх дэсантных караблях у Калінінград. Падчас двухдзённага пераходу нават паўдзельнічалі ў вучэннях па абароне карабельнага ордэра.
Не без дапамогі беларускіх салдат блакіраваныя тэрарысты знішчаны. Вучэнні Захад-2013 завяршыліся.
Трэція сумесныя манеўры не сталі радавымі. Яны беспрэцэдэнтныя па сваіх маштабах. Па колькасці асабовага складу і задзейнічанай тэхнікі яны перасягаюць усе папярэднія сумесныя манеўры. Было задзейнічана звыш 10 тысяч вайскоўцаў, выпрабоўваліся новыя ўзбраенні і ваенная тэхніка.
Але не гэта галоўнае. Упершыню адпрацавана міжвідавое ўзаемадзеянне рэгіянальнай групоўкі войскаў Беларусі і Расіі і Ваенна-марскога флоту. Зладжаныя дзеянні дзвюх армій паказалі, што прыціркі не патрэбныя. Вучэнні Захад-2013 сталі крокам да аператыўнай сумяшчальнасці Узброеных сіл Саюзнай дзяржавы Беларусі і Расіі.
