Выстава бальных строяў у Нацыянальнай бібліятэцы Беларусі

Напярэдадні Новага года і Каляд Нацыянальная бібліятэка Беларусі ў тандэме з калекцыянерам Ігарам Сурмачэўскім дораць беларусам святочны настрой. Адна з пляцовак кніжнай установы прымае выставу "Бляск убораў і таямніцы флірту". Гэта падборка арыгінальных рарытэтаў, бальных рэчаў дам і кавалераў 17-га, 18-га і 19-га стагоддзяў. У экспазіцыі тры сотні прадметаў, за кожным - свая гісторыя. Наталля Бардзілоўская раскажа больш падрабязна. 

Папялушка, якая бяжыць, спяшаючыся да апоўначы... Першы танец Наташы Растовай і маскарадныя пераапрананні Разалінды ў аперэце Штрауса "Лятучая мыш". У залатым фондзе сусветнага кінематографа сотні ўзораў баляў, якія заўсёды запамінаюцца як нешта яркае, дзівоснае, непаўторнае. Рамантыку і ўзнёсласць танцавальных вечароў не праз экран, а праз канкрэтны прадметны рад, да якога можна літаральна працягнуць руку, перадае аўтарскі праект Ігара Сурмачэўскага. Вядомы беларускі калекцыянер прэзентаваў не рэканструкцыю, а сапраўдныя рэчы рэальных людзей. Больш за тое, куратар зрабіў акцэнт менавіта на беларускіх балях і традыцыі калядных шляхетных вечароў на нашых землях.

Шоўк, аксаміт, карункі шантыльі, шклярус, якому тры стагоддзі, і натуральная біруза... Гэтыя тканіны, футра, біжутэрыя і нават ювелірныя ўпрыгажэнні - узор якасці: перажылі часы, але і захавалі першапачатковы выгляд. Экспанаты - сведчанне моды розных эпох: вось наборы штучных радзімак - мушак, актуальных для 17-18 стагоддзяў. Вось цыліндры, запатрабаванасць на якія жыла да пачатку мінулага стагоддзя. А вось першыя парфумныя шкляначкі - яны трымаюць пахі даўніны ў два-тры стагоддзі!

Найкаштоўнейшы рарытэт калекцыі - вось гэтая муфта з калісьці беласнежнага гарнастая! Прадмет 1900 года належаў арыстакратцы: ёсць звесткі - прадстаўніцы сям'і Габсбургаў. Такая ж рэч сёння знаходзіцца ў Метраполітен-музеі ў Нью-Йорку.

Зрэшты, менавіта з наведвання сусветных музеяў пачалося захапленне Ігара Сурмачэўскага фэшн-даўніной. Калекцыя Каралеўскага музея Швецыі з падборкай сукенак, камзолаў, фіжмаў натхніла беларуса на ўласны збор. Усяго ў яго куфрах - больш за 5 тысяч прадметаў. Вядома, выстаўленае зараз - толькі частка калекцыі. Сярод рарытэтаў вось і такія пацешныя рэчы...

Вееры і капелюшы, чаравікі і пальчаткі, люстэркі, якія, відавочна, не раз чулі: "Хто на свеце за ўсіх мілейшы ?", і нават дзявочыя дзённікі з амурнымі сакрэтамі. Падарожжа па гісторыі старадаўніх баляў - не толькі асветніцкае - атмасфернае, з энергетыкай падзей і свят, блізкіх людзям праз часы.