Міністр замежных спраў Беларусі Уладзімір Макей у Штаб-кватэры ААН абмеркаваў з Міністрам замежных спраў Сірыі Валідам аль-Муалемам урэгуляванне канфлікту ў краіне. Сірыйскі міністр падрабязна праінфармаваў беларускага калегу наконт стану спраў у Сірыі. Кіраўнік беларускага МЗС выказаў словы падтрымкі намаганням, накіраваным на мірнае вырашэнне канфлікту ў інтарэсах сірыйскага народа. Валід аль-Муалем выказаў падзяку беларускаму боку за гуманітарную дапамогу Сірыі.
Між тым, у раёне Алепа працягваецца наступ сірыйскай арміі. Ёй супрацьстаяць ісламісты, у асноўным гэта баевікі "Джабхат ан-Нусры". Спрабуючы вырвацца з акружэння ўрадавых войскаў, радыкалы атакавалі адразу сем раёнаў. Удары наносіліся хаатычна, пацярпелі мірныя жыхары. Згодна з заявай Дзіцячага фонду ААН ЮНІСЕФ, у выніку інтэнсіўных баёў у Алепа больш як 2 мільёны чалавек засталіся без вады.
