Навука - эканоміцы ведаў. Напярэдадні Дня беларускай навукі ў сценах Акадэміі навук уручылі ўзнагароды лепшым навукоўцам і даследчыкам краіны. Аўтары найболей перспектыўных распрацовак і методык асабіста прадэманстравалі свае дасягненні і распавялі аб праектах перад пачаткам урачыстай цырымоніі. У фае Акадэміі навук арганізавалі спецыяльную выставу. Хто ж удастоіўся высокай узнагароды і калі ідэі навукоўцаў змогуць ацаніць беларусы - ведае Наталля Тарасюк.
Удар па цырозе печані маюць намер нанесці ў Інстытуце біяхіміі біялагічна актыўных злучэнняў Гродна. Навукоўцы не толькі ўстанавілі ген, які адказвае за развіццё фіброзу печані, прапанавалі варыянты тэрапіі, але і стварылі лекавыя прэпараты. Вынік - 8-ы радок у рэйтынгу топ-10 вынікаў Акадэміі навук. На чарзе - лекі будучыні і для лячэння дыябета.
Лілія Надольнік, дырэктар Інстытута біяхіміі біялагічна актыўных злучэнняў: "Завершаныя даклінічныя даследаванні. Зараз мы шукаем арганізацыю-сувыканаўцу, вытворцу, каб правесці клінічныя выпрабаванні і наладзіць выпуск. Прэпарат, што датычыцца дыябета, не мае аналагаў".
А вось калегі з Інстытута біяарганічнай хіміі прапаноўваюць навуковыя падыходы для стварэння лекаў з супрацьпухліннай і процівіруснай актыўнасцю.
Даведацца аб будучых распрацоўках змаглі сёння ўсе наведвальнікі экспазыцыі, якая разгарнулася ў фае Акадэміі навук. Большасць стэндаў - менавіта з топ-10 паводле версіі акадэмікаў. Аўтары асабіста дэманстравалі высокім гасцям свае распрацоўкі. А затым, заўважу, напярэдадні Дня беларускай навукі атрымалі заслужаныя ўзнагароды.
А вось праектаванне другога кальца вакол Мінска павярнулася ўдалай знаходкай ужо для навукоўцаў Інстытута гісторыі. Раскопкі восенню 2015-га дапамогуць даведацца больш аб побыце славян.
Сярод знаходак апынуліся ўпрыгажэнні з каляровых металаў, вырабы з каменя, фрагменты керамікі і нават старажытная зброя. Гэтыя каштоўнасці сёння таксама прадэманстравалі гасцям выставы.
Нягледзячы на тое, што даследаванне гісторыка-культурнага комплексу "Васілеўшчына" ўвайшло ў топ-10 Акадэміі навук, навукоўцы працягваюць чысціць ад іржы, сістэматызаваць і дэталёва вывучаць знаходкі. А дзякуючы раскопкам у вёсцы Васілеўшчына на мяжы Мінскага і Дзяржынскага раёнаў (а гэта парадку 20 тысяч квадратных метраў) атрымалася выявіць гліняныя чыгуны, наканечнікі для стрэлаў, вастрыльныя камяні. У будучыні гэтыя прадметы папоўняць экспазыцыю музея Акадэміі навук.
