Студэнты з Японіі, Паўднёвай Карэі, Эквадора, Нігерыі ўсё часцей імкнуцца вучыцца ў беларускіх універсітэтах. Толькі ў БДУ вышэйшую адукацыю сёння атрымліваюць грамадзяне 50 краін. Большасць з іх пасля заканчэння вучобы паедуць працаваць на радзіму. Самыя запатрабаваныя спецыяльнасці - філалогія, міжнародныя адносіны, эканоміка і журналістыка. Чаму студэнты-замежнікі выбіраюць беларускія ВНУ?
На студэнцкім фестывалі нацыянальных культур пабывала Надзея Сербіненка. БДУ – самая вялікая навуковая сям'я Беларусі. Тут вучацца студэнты з 50 краін свету. Якасць беларускай адукацыі высока ацэньваюць у краінах Азіі, Блізкага Усходу, Заходняй Еўропы і Афрыкі.
Олівер Оджэ - ураджэнец Лагаса: самага густанаселенага горада не толькі Нігерыі, але і ўсяго Афрыканскага кантынента. У трынаццацімільённым мегаполісе ёсць чатыры ўласныя універсітэты, але атрымліваць прафесію мікрабіёлага Олівер вырашыў у Мінску.
Фестываль культур "Беларусь вітае сяброў" праходзіць ў фармаце экскурсійнага тура. Усяго - 16 краін, сярод якіх Японія, Кітай, Турцыя, Эквадор, Карэя, Індыя, Чэхія. Сваю культуру студэнты прэзентуюць праз нацыянальную кухню, вершы і танцы.
Ва ўніверсітэце – дзве з паловай тысячы замежных студэнтаў. Сёння БДУ ў тройцы лепшых у СНД і 354-ы ў прэстыжным брытанскім рэйтынгу QS.
Самая вялікая студэнцкая дыяспара - з Кітая, на другім месцы – Туркменістан, далей – Расія і Казахстан.
Студэнтаў з іншых краін прываблівае дыплом міжнароднага ўзору і прымальны кошт навучання. А для беларускіх студэнтаў супрацоўніцтва з замежнымі ВНУ – магчымасць наладжваць адукацыйныя абмены і стажыроўкі.
