Гэтыя пытанні паднімаліся на вышэйшым узроўні. Жорстка раскрытыкаваў іх наш Прэзідэнт. У выніку пад кіраўніцтвам Камітэта дзяржкантролю была створана спецыяльная рабочая група, актыўна вядзецца праверка на месцах. Толькі ў Гродзенскім і Брэсцкім рэгіёнах сумы няправільных разлікаў перавысілі 3 з паловай мільярды рублёў. Некаторыя моманты і зусім даходзяць да абсурду. Напрыклад, жыхарам трох дамоў у Гродне прыйшлося плаціць за карыстанне ліфтам, якога ў іх з моманту будаўніцтва няма.
Як зменіцца тарыфная палітыка і што будзе пералічана ў будучых квітанцыях - даведваўся Дзмітрый Смірноў.
Гэта той выпадак, калі з пачуццём нерэальнасці таго, што адбываецца, дапамагае змірыцца толькі гумар. Сям'ю Рамуальда Зеленкевіча, як і жыхароў яшчэ трох пяціпавярховых дамоў у Гродне, камунальнікі папрасілі заплаціць за карыстанне ліфтам.
Калі верыць гэтаму разліковаму паведамленню, вось у гэтай сцяне павінен знаходзіцца ліфт. Аднак жыхары гэтага дома ў Гродне ўжо больш як 30 гадоў паднімаюцца ў свае кватэры выключна па лесвіцы.
Сам Рамуальд жартуе, што чакае камунальнікаў, якія, калі ўжо выстаўляюць рахункі, зараз абавязаныя ўстанавіць і ліфт.
Але надзея з'явілася. ЖЭС паабяцаў зрабіць поўны пераразлік і вярнуць грошы. Казус назвалі памылкай абсталявання. Між тым, паводле слоў экспертаў, з-за няправільнага налічэння камунальных рахункаў толькі жыхары Гродзенскай вобласці пераплацілі мільярды рублёў.
Камунальную праблему ўзяў на кантроль Кіраўнік дзяржавы. Спецыяльна створаная група на чале са старшынёй Дзяржкантролю праверыць усе разлікі камунальных тарыфаў.
Дарэчы, як сказаў Леанід Анфімаў у інтэрв'ю "Галоўнаму эфіру", сітуацыя ўзнікла з-за адсутнасці адзіных прынцыпаў тарыфікацыі або нават па асабістай расхлябанасці некаторых чыноўнікаў.
Зразумела, што ў гісторыі з тарыфамі будзе наведзены парадак. Але трэба разумець, што і самі людзі павінны ўкладваць у камунальную інфраструктуру. Таму ўжо зараз распрацавана праграма пакрыцця затрат на паслугі ЖКГ, якая пройдзе за тры этапы.
Паводле канцэпцыі ўрада, да канца 2016 года гэта будзе 50% ад усяго кошту камунальных плацяжоў. Да канца 2017 - 75%, а да канца 2018 года - усе 100. У выніку цана пытання ўзрасце ў 1,5-2 разы.
Між тым, паводле слоў спецыялістаў, тарыфы на жыллёва-камунальныя паслугі за студзень будуць пералічаныя ў бок памяншэння. Вынікі праверкі і абноўленая схема налічэння тарыфаў ляжа на стол да Кіраўніка дзяржавы.
