Сёння цёплыя словы і пажаданні атрымліваюць тыя, хто дорыць жыццё, любіць, выхоўвае і накіроўвае па жыцці. У Беларусі адзначаюць Дзень маці. Са святам беларусак павіншаваў наш Прэзідэнт. "Сардэчна дзякую кожнай з вас за чуласць, цярпенне і клопат пра дабрабыт сям'і і ўтульнасць хатняга ачага", - адзначыў Аляксандр Лукашэнка.
Усяго ў нашай краіне амаль 4 млн 60 тыс. жанчын. Больш за палову прадстаўніц прыгожага полу ў шлюбе, пражываюць у горадзе і маюць вышэйшую або сярэднюю спецыяльную адукацыю. Амаль 50 % жанчын нарадзілі дваіх дзяцей. Дарэчы, у рэйтынгу самых камфортных для мацярынства краін наша дзяржава займае 25-ю пазіцыю. Сёння ў Беларусі 123 тыс. шматдзетных сем'яў, у якіх выхоўваецца больш за 400 тыс. дзяцей. Самымі шматдзетнымі з'яўляюцца Брэсцкая і Мінская вобласці. Наша краіна актыўна выступае ў абарону сям'і і сямейных каштоўнасцей. Адна значная мера падтрымкі - сямейны капітал. З 2020 года дадзена права датэрміновага выкарыстання яго сродкаў па найважнейшых для сям'і кірунках: паляпшэнне жыллёвых умоў, атрыманне платных медыцынскіх і адукацыйных паслуг. На сённяшні дзень ужо больш за 131 тыс. шматдзетных сем'яў скарысталіся сродкамі сямейнага капіталу.
Стартуе Тыдзень бацькоўскай любові
Сёлета прыняты новыя змяненні ў Працоўны кодэкс, якія таксама пашыраюць гарантыі бацькоў, што працуюць, з трыма і больш дзецьмі або што выхоўваюць дзіця з інваліднасцю. Так, з 1 студзеня 2024-га ў іх з'явіцца магчымасць замест вольнага дня на тыдзень выбраць скарачэнне працы або змены на адну гадзіну. Зручнымі будуць і новыя падыходы да дыстанцыйнай працы. Дарэчы, сёння стартуе Тыдзень бацькоўскай любові. А ўжо ў наступную суботу, 21 кастрычніка, у Беларусі адзначаць Дзень бацькі.