Дапамога ў пошуку працы. З пачатку года ў службы занятасці Мінскай вобласці звярнуліся 30 000 чалавек. З іх 20 000 - беспрацоўныя. Пошук найбольш удалага занятку складае прыкладна месяц. Некаторыя адразу адпраўляюцца на прафесійную падрыхтоўку або перападрыхтоўку.
Як вырашаюцца пытанні працаўладкавання незанятых грамадзян і якія спецыяльнасці можна асвойваць, раскажа Наталля Кузьміцкая. У якасці беспрацоўных у Слуцку афіцыйна зарэгістраваныя амаль 420 чалавек. Гэта пераважна мужчыны ва ўзросце ад 35 да 50 гадоў з сярэдняй адукацыяй. Служба занятасці прапаноўвае ім працаўладкаванне ў сферах гандлю, будаўніцтва і сельскай гаспадаркі.
База вакансій штодзень папаўняецца. Суіскальнікі могуць шукаць працу як самастойна, так і з дапамогай спецыялістаў службы занятасці.
Каб пашырыць пошук працы, суіскальнікаў накіроўваюць на навучанне. У слуцкім каледжы зараз шэсць груп ад цэнтра занятасці. Паўгода слухачы спасцігаюць асновы новых прафесій і пасля заканчэння курсаў атрымліваюць магчымасць працаваць прадаўцамі, аператарамі ЭВМ, швачкамі.
Існуюць групы і павышэння кваліфікацыі. Майстар на ўсе рукі Раман Курачкін да запісаў у працоўнай кніжцы, дзе ўжо адзначаны цясляр, стропальшчык і рамшчык, сёлета вырашыў дадаць яшчэ і электрагазазваршчыка.
За ўвесь час супрацоўніцтва службы занятасці і каледжа падрыхтавана амаль 3000 рабочых. Дарэчы, у Слуцку няма недахопу і высокакваліфікаваных кадраў. Штогод на працу па размеркаванні сюды прыязджаюць выпускнікі вышэйшых навучальных устаноў з усёй краіны.
У 98% выпадкаў маладыя спецыялісты застаюцца жыць і працаваць у Слуцку. У раёне і горадзе кожнага стараюцца забяспечыць жыллём ці аказаць матэрыяльную дапамогу пры выдатках на яго арэнду.
