15 гадоў пазбаўлення волі ў калоніі агульнага рэжыму запытаў пракурор для абвінавачанага Уладзіслава Казакевіча.
Судовыя спрэчкі па справе аб нападзе ў "Новай Еўропе" прайшлі ў Мінскім гарадскім судзе. На думку дзяржабвінаваўцы, віна падсуднага цалкам даказаная, а дзеянні "вызначаліся асаблівым цынізмам, жорсткасцю і пагардлівасцю да норм маралі". Асноўная частка выступлення пракурора доўжылася каля гадзіны. Муж забітай бензапілой жанчыны Аляксандр Александронец выступіў у судовых спрэчках і таксама заявіў, што віна Казакевіча цалкам даказаная. Ён адзначыў, што абвінавачаны не раскаяўся ў зробленым, і лічыць, што да яго трэба ўжыць "самае суровае пакаранне". Маці забітай таксама папрасіла пакарання "на ўсю строгасць закона". У сваім выступленні жанчына адзначыла, што яе гняце той факт, што падсудны не раскаяўся і не спачувае пацярпелым. Самае строгае пакаранне для абвінавачанага таксама папрасілі дачка і сястра забітай. Пацярпелыя, сярод якіх маці загінуўшай Алены Александронец, яе муж, дачка, сястра, а таксама яшчэ тры жанчыны, заявілі да Казакевіча іскі аб пакрыцці матэрыяльнай і маральнай шкоды на суму больш за 360 000 рублёў.
