Фізкультурна-спартыўны комплекс "Аквамарын" у Мар'інай Горцы ўсяго за два месяцы выйшаў практычна на поўную магутнасць працы.
На базе будынка размясцілася мясцовая СДЮШАР, у якой працуе 6 аддзяленняў: плаванне, барацьба (вольная і грэка-рымская), футбол, баскетбол і лёгкая атлетыка. Сёння ў школе займаецца больш чым 600 юных атлетаў, хоць адкрыты "Аквамарын" быў зусім нядаўна - 25 ліпеня.
Аздараўленчы комплекс стаў падарункам для Мар'інай Горкі ў гонар юбілею горада. Радасць з мясцовымі жыхарамі тады ў дзень адкрыцця раздзяліў і Аляксандр Лукашэнка, бо будаўніцтва такіх важных сацыяльных аб'ектаў на асабістым кантролі кіраўніка дзяржавы. У комплексе два басейны (для вопытных плывуноў і тых, хто толькі пачынае займацца плаваннем), зала барацьбы, трэнажорная зала... Увогуле створаны ўсе ўмовы для выхавання і росту будучых зорак спорту і далёка не толькі.
У секцыі плавання Пухавіцкай СДЮШАР сёння адкрыта і працуе 14 дзіцячых груп, заняткі бясплатныя. Аказваючы ж платныя паслугі мясцовым жыхарам, за два месяцы работы спарткомплекс прыцягнуў больш за 50 000 рублёў пазабюджэтных сродкаў.
