Ураджай, толькі падводны, збіраюць аквакамбайны. Тэхніка дапамагае спецыялістам сталічнага водаканала праводзіць ачыстку рэк і вадасховішчаў Мінска і вобласці ад водарасцей. У перыяд актыўнага цвіцення некаторыя расліны могуць быць небяспечнымі для аматараў купання - пры дакрананні да іх можна атрымаць апёкі.
Акрамя таго, за падводнае пустазелле чапляецца бытавое смецце, якое потым складана прыбіраць.
Ілья Цвяткоў пагрузіўся ў працэс пакосу.
Вось такі аквакамбайн курсіруе гэтымі днямі па водных артэрыях Мінска. Яго задача чысціць рэкі і вадасховішчы ад водарасцей. Сістэма праверана на працаздольнасць, усе механізмы ў парадку, нажы навостраныя - можна распачынаць працэс.
Да незвычайных перамяшчэнняў плывучай тэхнікі па акваторыі Свіслачы мінчане яшчэ не прывыклі – водныя камбайны адразу трапляюць у стужкі сацсетак. А вось спецыялісты, якія кожную раніцу выязджаюць на аквапакос, да такой працы прызвычаіліся. Аднак кіраваць апаратам – справа не самая лёгкая.
Зоны апрацоўкі - акваторыі Камсамольскага возера, Мінскага мора і Цнянскага вадасховішча. За лета ачыстку прыходзіцца рабіць да трох разоў - багавінне расце вельмі хутка і можа стаць небяспечным для аматараў воднага адпачынку, яно выклікае раздражненне на скуры.
Водны ўраджай збіраюць у спецыяльны бокс, а потым выгружаюць на бераг. Пасля водарасці адпраўляюць на перапрацоўку. Атрыманы прадукт ідзе на корм буйной рагатай жывёле, а таксама ўносяць у глебу ў якасці арганікі.