Астанкі пяці байцоў Чырвонай Арміі з усімі ўшанаваннямі перапахавалі ў Лёзненскім раёне

Яны былі паднятыя падчас вахты памяці. Таксама члены пошукавага атрада  знайшлі элементы амуніцыі. Імя аднаго абаронцы ўдалося высветліць. Гэта старшы лейтэнант медыцынскай службы Муратаў Іван Фёдаравіч 1916 года нараджэння. Зараз шукаюць яго сваякоў. Астанкі  байцоў  знойдуць спачын на воінскім пахаванні ў аграгарадку Крынкі. Тут пахавана больш за 4 тысячы салдат і афіцэраў. 

Андрэй Ільюшкін, удзельнік ваенна-гістарычнага клуба пры Віцебскім абласным музеі Героя Савецкага Саюза М. Ф. Шмырова: "Астанкі былі знойдзены на мяжы Віцебскага і Лёзненскага раёнаў у раёне былых вёсак Кажэйкава і Ганькава. Якраз 41-шы асобны медыцынскі санітарны батальён знаходзіўся тут з лютага па красавік 1944 года".

Падчас Вялікай Айчыннай райцэнтр быў практычна разбураны. Цалкам або часткова былі спалены каля 200 вёсак. Усяго на тэрыторыі Лёзненскага раёна знаходзяцца больш чым 80 пахаванняў часоў гэтай вайны. У год 75-годдзя вызвалення Беларусі ад нямецка-фашысцкіх захопнікаў  у рэгіёне працягваецца вялікая пошукавая работа па высвятленні імёнаў загінуўшых.