Ленінскі раён сталіцы лідзіруе па анкалагічных захворваннях. З тысячы двухсот пацыентаў 90% прыпадае менавіта на гэты раён. Бясплатную паліятыўную дапамогу яны атрымліваюць на базе раённых паліклінік і выязных службаў дапамогі дома.
Марына Мураўёва даведалася пра асаблівасці работы паліятыўных кабінетаў. Арганізацыя паліятыўнай дапамогі ў Мінску пачалася 7 гадоў таму. Сёння яе атрымліваюць у бальніцы паліятыўнага догляду Хоспіс і на базе 11-й гарадской клінічнай бальніцы. Зараз там працуе аддзяленне паліятыўнай дапамогі на 30 ложкаў. Яго пацыенты – людзі, хвароба якіх непадуладная сучаснай медыцыне. Тры гады таму паліятыўная дапамога стала геаграфічна бліжэй да пацыентаў. Кабінеты паліятыўнай медыцыны знаходзяцца ў кожным раёне сталіцы. Спецыялісты абслугоўваюць сваіх пацыентаў не толькі на базе паліклінік, але ў асноўным наведваюць хворых дома. У сваім кабінеце пры паліклініцы Галіна Уладзіміраўна бывае дзве гадзіны на дзень. Астатні час наведвае пацыентаў дома. У патранажнай службе яна толькі паўтара года. Дагэтуль усё жыццё працавала ў хірургічным аддзяленні дарожнай бальніцы. Сёння яе пацыенты – анкалагічныя хворыя апошняй стадыі. Кожны дзень жанчына апрацоўвае пролежні хворых, сочыць за курсам лячэння, навучае родных, як даглядаць хворага. На дапамогу прыходзіць дабрыня і паўвекавы вопыт працы медсястрой. Паслугі выязных службаў дапамогі дома для сем’яў хворых бясплатныя. На кожны раён горада прыходзіцца па дзве патранажныя сястры. Большая колькасць пацыентаў паліятыўнай медыцыны знаходзіцца на ўліку ў Ленінскім раёне сталіцы. Летась амаль 1200 мінчан атрымалі неабходную дапамогу.
