У Гарадку ўрачыста адкрыўся XXX Дзень беларускага пісьменства. Любімае свята слова піша сваю гісторыю з 1994 года. Першым Дзень беларускага пісьменства прымаў Полацк. Сімвалічна, што і юбілейнае свята таксама праходзіць на віцебскай зямлі. Яго цяперашняя сталіца - горад Гарадок - адзін з самых старажытных на беларускай зямлі. А яшчэ з ім звязана самая вялікая загадка беларускай літаратуры - стварэнне сатырычнай паэмы "Тарас на Парнасе". Сёння ўдзельнікаў свята ў Вераніцынскім скверы сустракае скульптура таго самага лесніка Тараса, а кожны куток прыгожага мястэчка пацвярджае, якая багатая і самабытная беларуская культура.
Трансляцыю цырымоній адкрыцця і закрыцця свята гледачы могуць убачыць на тэлеканале "Беларусь 3", а таксама два дні прамых уключэнняў з імправізаванай студыі.
Самыя яркія моманты свята - у рэпартажы Вольгі Маслоўскай.
"Ніякае багацце людзей не бывае даражэйшым за іх
родную мову", - пісаў Колас. Слова яднае, акрыяе і суцішае. Бо яно ад
роднай зямлі, што завецца Беларуссю. 30-ы год запар Дзень
беларускага пісьменства збірае творчых і натхнёных. Дагэтуль свята
ганарова сустракалі Полацк, Орша, Капыль, Слонім, Быхаў, Шчучын. Сёлета пачэсная роля стаць сталіцай Дня пісьменства выпала Гарадку.
Фестываль кнігі і прэсы, навукова-практычная
канферэнцыя "Гарадоцкія чытанні", чэлендж жаночай паэзіі, свята
славянскіх традыцый - сёння Гарадок уражвае не менш, чым Парнас, калі
туды трапіў ляснік Тарас.
А вось ён і сам са стрэльбай за плячыма ідзе па цецерукоў.
Доўгі час паэма "Тарас на Парнасе" лічылася ананімным творам. Але ў
1973 годзе даследчыкам Генадзем Кісялёвым было даказана, што радкі,
поўныя народнай мудрасці і гумару, належаць ураджэнцу Гарадоччыны
Канстанціну Вераніцыну.
І сёння, у Дзень беларускага пісьменства, у Гарадку ў
памяць пра таленавітага земляка адкрыўся Вераніцынскі сквер са
скульптурай буквара і іншымі тэматычнымі выявамі, зробленымі студэнтамі
Беларускай акадэміі мастацтваў. Дарэчы, назву лакацыі выбралі самі
жыхары райцэнтра.
На памяць пра гарадоцкія ўрачыстасці – гашэнне
арыгінальнай маркі "Дзень беларускага пісьменства". Вядома, былі і
падарункі жыхарам сталіцы свята. Так, у Гарадку дзякуючы праекту
Прэзідэнцкага спартыўнага клуба "Спорт для ўсіх" з'явіўся запатрабаваны і дзецьмі, і дарослымі аб'ект: шматфункцыянальная пляцоўка са штучным пакрыццём і эфектыўнымі трэнажорамі.
Літаратурная спадчына і гістарычная памяць
Мір і стваральная праца, 80-годдзе вызвалення Гарадка ад
нямецка-фашысцкіх захопнікаў, культура і традыцыі паўночнага рэгіёна, а
таксама 140-годдзе з дня нараджэння Янкі Маўра – юбілейнае свята па
тэматыцы глыбокае і шматграннае. У выставачных павільёнах найбольш
яркія кніжныя праекты, выдадзеныя ў гарадах, якія былі ў свой час сталіцамі Дня беларускага пісьменства. Так, Добруш прэзентуе творы паэтэсы Людмілы Яськовай.
Жывое беларускае слова гучала сёння падчас вечара
сямейнага чытання "Бацькоўскі дар". Беларускі саюз жанчын запрасіў да
ўдзелу ў літаратурнай сустрэчы сем'і з дзецьмі. Разам чыталі, разважалі,
дзяліліся ўражаннямі.
Свята роднага слова ў Гарадку працягваецца. На галоўнай сцэне ідзе ўрачыстае адкрыццё Дня беларускага пісьменства.
Трансляцыю цырымоніі вядзе тэлеканал "Беларусь 3". З хвіліны на хвіліну
раскрыецца галоўная інтрыга: будуць названы імёны лаўрэатаў
Нацыянальнай літаратурнай прэміі. Сёлета на конкурс было пададзена 68 кніжных праектаў. Журы выбрала 6 пераможцаў.