Гаспадарам палёў не перашкодзіла дажджлівае надвор'е. І за званне сапраўднага прафесіянала пазмагаліся 24 чалавекі - лепшыя механізатары раёнаў. Як праходзіў конкурс - раскажа Аляксандр Харавец.
Гул магутных рухавікоў энерганасычаных трактараў і бляск плугоў… Сёння на адным з палёў Пухавіцкага раёна – тэст-драйв глебаапрацоўчай тэхнікі і майстар-клас ад лепшых аратых вобласці. Для Івана Шацілы праца па ўзворванні зямлі адначасова і адна з самых любімых і самых цяжкіх. Першыя ўрокі па кіраванні плугамі лепшаму механізатару Дзяржынскага раёна даваў яшчэ бацька. А сёння ён самастойна з лёгкасцю апрацоўвае больш за 20 гектараў за дзень.
Абласны конкурс аратых праходзіць трэці раз. Сёлета за званне лепшага ў сваёй справе змагаліся 24 механізатары. Кожны з іх – пераможца раённых спаборніцтваў.
Удзельнікі конкурсу павінны узараць па 8 сотак. Прычым хуткасць у гэтай справе далёка не самае галоўнае. У першую чаргу суддзі звяртаюць увагу на раўнамернасць працы кожнага корпуса плуга.
Паводле слоў аграрыяў, менавіта ад якасці ўзворвання поля залежыць будучы ураджай. Таму першая баразна павінна быць роўнай, без грэбняў і правалаў. Таксама ацэньваецца прамалінейнасць і глыбіня разоры.
За спаборніцтвам вопытных механізатараў сачылі і навучэнцы Мар'інагорскага аграрна-тэхнічнага каледжа. У будучым іх праца таксама неадрыўна будзе звязана з зямлёй.
Увогуле ў Мінскай вобласці штогод узворваецца каля мільёна гектараў палёў. І атрыманне рэкордных ураджаяў магчыма толькі пры поўным захаванні тэхналогіі.
Пераможцы конкурсу атрымалі грашовыя ўзнагароды і дыпломы. Але ж самае галоўнае, паводле слоў саміх аратых, гэта каштоўны вопыт, які яны сёння набылі.