Грамадства псіхалагічна гатовае да павышэння пенсіённага ўзросту. Такое меркаванне выказаў кіраўнік Камітэта дзяржкантролю Леанід Анфімаў сёння падчас сустрэчы з працоўным калектывам холдынга "Салеа". Галоўны кантралёр краіны падкрэсліў, што ў Беларусі склаліся эканамічныя і дэмаграфічныя ўмовы, якія вымушаюць прымаць рашэнне наконт пенсіённага пытання. Калі павышэнне будзе адбывацца паэтапна для жанчын і мужчын на 3 гады, то гэта стане аптымальным рашэннем у цяперашніх умовах. Канчатковая кропка ў гэтым пытанні будзе пастаўленая Прэзідэнтам у найбліжэйшы час, адзначыў кіраўнік Камітэта дзяржкантролю. Таксама прагучалі пытанні і наконт новых тарыфаў на жыллёва-камунальныя паслугі.
Леанід Анфімаў, Старшыня КДК Беларусі: "Тэмы, якія хвалююць грамадства, - гэта павышэнне пенсіённага ўзросту, тарыфы на ЖКГ. Прынамсі я лічу, што з падпісаннем учора Прэзідэнтам указа па тарыфах ЖКГ усе гэтыя хваляванні, якія ўзніклі ў грамадстве пасля атрымання студзеньскіх жыровак, улягуцца, і людзі атрымаюць новыя жыроўкі са зразумелымі тарыфамі, са зразумелымі сумамі, якія не выклічуць нездаволенасці".
Сёння ж Леанід Анфімаў удзельнічаў у гарачай лініі, што прайшла ў Дзяржынскім выканкаме. Да старшыні Камітэта дзяржкантролю звярталіся з пытаннямі зямельнага заканадаўства, камунальнай сферы і працаўладкавання.
