Капыль у чаканні Дня пісьменнасці! Хоць ён традыцыйна адзначаецца ў першую нядзелю верасня, ужо сёння стартаваў двухдзённы Фестываль кнігі і прэсы. Прэзідэнт Беларусі Аляксандр Лукашэнка накіраваў прывітанне ўдзельнікам і гасцям свята.
Прывітанне Прэзідэнта ўдзельнікам і гасцям Дня беларускай пісьменнасці
У жыцці народа літаратура заўсёды была найважнейшым сродкам спазнання свету і выхавання асобы. Творчасць Максіма Багдановіча, Івана Шамякіна, Кандрата Крапівы, Івана Мележа і іншых айчынных пісьменнікаў і паэтаў, юбілеі якіх будуць адзначаны падчас форуму, з'яўляецца невычарпальнай крыніцай нацыянальнага гонару. Дзякуючы вядомым беларускім класікам і новаму пакаленню таленавітай і патрыятычнай моладзі, у краіне берагуць гістарычную памяць беларускага народа, зацвярджаюць яго галоўныя каштоўнасці: сумленнасць, справядлівасць, талерантнасць, павагу да чалавека працы і вялікую любоў да роднай зямлі!, - гаворыцца ў прывітанні.
На сённяшнім мерапрыемстве экспазіцыя падзелена на тэматычныя зоны: "Традыцыі і сучаснасць" - аб нацыянальных звычаях, "Разам з кнігай мы расцём" - літаратура для самых маленькіх, "Памяць" - гістарычная кніга, "Слова пісьменніка" - з прэзентацыямі сучасных выданняў і аўтограф-сесіямі. А цэнтральны павільён "Адзінства", прысвечаны Году народнага адзінства. На выставе прадстаўлены фатаграфіі, дакументы і газеты 1921-1939 гадоў. Усяго больш як 200 асобнікаў, копіі якіх наведвальнікі змогуць павезці з сабой у якасці сувеніра.
Замест паперы з ручкай або клавіятуры - футбольны мяч. Сёння адбудзецца таварыскі матч паміж пісьменнікамі і іх чытачамі. А ўвечар на бенефіс запрашае старшыня Саюза пісьменнікаў, чые творы перакладзены на 20 моў свету, - Мікалай Чаргінец.
