Замежнікі, якія прыязджаюць у Беларусь, змогуць зарэгістравацца праз Інтэрнэт бясплатна

Зараз замежнікі, што прыязджаюць у Беларусь, бясплатна змогуць зарэгістравацца праз Інтэрнэт. МУС і Нацыянальны цэнтр электронных паслуг рэалізавалі гэтую магчымасць. Ужо суткі як дзейнічае гэтая норма. І замежныя грамадзяне, і асобы без грамадзянства, якія прыязджаюць у нашу краіну, змогуць прайсці электронную рэгістрацыю, не звяртаючыся асабіста ў органы ўнутраных спраў. Як паведамляецца, з дапамогай камп'ютара або мабільнага тэлефона можна стварыць асабісты кабінет на адзіным партале, прайсці працэс рэгістрацыі, запоўніўшы заяву. Зрабіць гэта можа не толькі замежнік, але і яго прадстаўнік са свайго асабістага кабінета. Магчымасць звароту ў падраздзяленні па грамадзянстве і міграцыі таксама захоўваецца. І зрабіць гэта прыйдзецца для падаўжэння тэрміна рэгістрацыі. Пры гэтым у МУС адзначылі, што замежнікі, якія прыбылі ў Беларусь з Расіі, павінны прайсці працэс рэгістрацыі асабіста ў міграцыйным падраздзяленні органа ўнутраных спраў. Нагадаем, раней замежнікі, якія прыязджаюць у Беларусь, на працягу пяці дзён былі абавязаныя зарэгістравацца ў аддзеле па грамадзянстве і міграцыі. Норма меркавала і аплату - адну базавую. Зараз, адзначым, паслуга электроннай рэгістрацыі бясплатная.