Гуманітарную дапамогу з Беларусі даставілі ў Зімбабвэ

Напярэдадні познім вечарам спецборт вылецеў з Нацыянальнага аэрапорта Мінск - апошнія суткі ішлі перамовы з некалькімі краінамі аб дазапраўцы, паколькі Судан закрыў паветраную прастору з-за ваеннага перавароту ў краіне. На борце - 92 тоны разнастайных тавараў. Спіс быў узгоднены з прымаючым бокам. Што зараз адбываецца ў Паўднёва-Усходняй Афрыцы? Здымачная група Агенцтва тэленавін суправаджае гуманітарны груз. Уся апошняя інфармацыя ва Уладзіміра Каралёва. 

Цяжкія аблокі на працягу амаль усяго палёту. З красавіка па чэрвень у рэгіёне халаднаватая сухая зіма, а ў гарах нават замаразкі. Сезон дажджоў у Паўднёвай Афрыцы наступае ў кастрычніку і працягваецца да сакавіка, кожны год паводкі прыводзяць таксама да ахвяраў і разбурэнняў. Але 2019-ы апынуўся ўжо занадта смяротным. 

Амаль праз 8 гадзін палёту транспартны "Боінг 747" прызямляецца на экватары, у горадзе Энтэбэ ва Угандзе. Тут нас чакае дазапраўка, а пасля 3-гадзінны пералёт у Харарэ. 

Роўна апоўдні па мінскім часе адзін з самых вялікіх самалётаў у свеце ў сталіцы Зімбабвэ - горадзе Харарэ. Беларускія ратавальнікі і прадстаўнікі дыпмісіі прама ў аэрапорце перадаюць мясцовым уладам больш як 40 тон гуманітарнага грузу. Гэта вопратка, абутак, ежа, дзіцячае харчаванне, школьныя прылады, мыла, пральны парашок, коўдры і шматлікае іншае. Сёння гэтыя тавары як ніколі патрэбныя ў пацярпелых раёнах. Ахвярамі ў Зімбабвэ ў выніку трапічнага цыклона лічацца больш як 300 чалавек. Менавіта таму тут было аб'яўлена становішча нацыянальнай катастрофы. 

Урад Зімбабвэ і Мазамбіка звярнуўся па дапамогу да сусветнай супольнасці, у тым ліку і да нашай краіны, пасля смяротнага цыклона "Ідай". Яго завуць найбуйнейшай прыроднай катастрофай у Паўднёвым паўшар'і. Аб гэтым сведчаць і маштабы разбурэнняў. Ураганны вецер, хуткасць якога дасягала 170 км/г, абрынуўся на Мазамбік, Зімбабвэ і Малаві ў канцы сакавіка. Цыклон стаў прычынай наймацнейшай за апошнія дзесяцігоддзі паводкі на паўднёвым усходзе кантынента. Буянства прыроды выклікала гуманітарную катастрофу, а ў асобных гарадах - усплёск халеры. Наступствы стыхіі закранулі каля 3 млн. чалавек.