Беларусь заўсёды гатовая працягнуць руку дапамогі краінам і галоўнае - народам гэтых краін, якія маюць у гэтым патрэбу. Напярэдадні беларускія ратавальнікі паспяхова завяршылі гуманітарную місію на Блізкім Усходзе. Як мы ўжо адзначылі, у пачатку тыдня наша краіна ўжо даставіла дапамогу ў Ірак. А напярэдадні борт МНС з чарговай высакароднай місіяй пабываў у Сірыі. Дабрачынны груз, а гэта прадукты харчавання, нашы ратавальнікі паспяхова перадалі сірыйскаму боку. Хоць за некалькі кіламетраў ад месца разгрузкі праходзілі баі.
Аляксандр Савенка сустрэўся з тымі, хто меў патрэбу ў гэтай дапамозе. 7000 метраў над узроўнем мора. Пад крыламі ІЛа ІГІЛ, крыху далей Сірыя. Непрадбачаная сітуацыя ўжо на падлёце да Дамаска.
Знішчальнік праляцеў побач з беларускім бортам. Далей рэзка зніжаем вышыню - заход з процілеглага боку аэрапорта, пасля з рэзкім нахілам і разваротам. Гэта называецца пасадка па-афганску.
Ужо на зямлі дабрачынную місію сустракала дэлегацыя афіцыйных асоб. Губернатар Дамаска Хусейн Махлюф і пасол Беларусі ў Сірыі Аляксандр Панамароў выступілі з прывітальным словам. Прадстаўнік нашага МЗС адзначыў, што гэтая гуманітарная дапамога - дзейсны крок у збліжэнні і ўмацаванні супрацоўніцтва паміж дзвюма краінамі.
Аляксандр Панамароў, Пасол Беларусі ў Сірыі: "Нягледзячы на тое, што краіна знаходзіцца ў стане вайны, мы працягваем з Сірыяй нарошчваць абароты па шэрагу пытанняў актуальных. Першым чынам, гэта палітычнае ўзаемадзеянне на міжнароднай арэне. Гандлёва-эканамічны блок летась атрымаў сур'ёзны імпульс. Нам удалося аб'ем тавараабароту вывесці за 30 мільёнаў долараў за мінулы год".
Гэтая гуманітарка - не толькі дапамога абяздоленым сірыйцам. Больш за 40 тон прадуктаў харчавання - гэта нейкі крэдыт даверу. Так гавораць мясцовыя ўлады. Бо зразумела, што Беларусь таксама знаходзіцца ў няпростай сітуацыі, улічваючы сусветныя фінансавыя складанасці. Але менавіта беларусы аказаліся гатовыя дапамагчы жыхарам Сірыі.
Адразу пасля разгрузкі беларускіх ратавальнікаў запрасілі наведаць лагер сірыйскіх бежанцаў. Такіх у краіне не адзін дзясятак. Варта адзначыць, што больш як за 4 гады колькасць унутраных перасяленцаў у Сірыі вырасла да 8 мільёнаў. З іх асноўная маса гэта жанчыны, старыя і дзеці.
Мы знаходзімся ў лагеры бежанцаў у прыгарадзе Дамаска пад назвай Хурджэла. Тут пражывае прыкладна 270 сем'яў. Як бачна, побач палатачны гарадок, школа. Вельмі шмат дзяцей. Усе яны гавораць: мы расцём на злосць тэрарызму.
У ім пражывае больш за 2 тысячы чалавек, якім не раз прыходзілася змяняць месца пражывання з-за атак тэрарыстаў "Ісламскай дзяржавы". Для Закія Харбі гэты лагер за апошні год ужо трэці, у якім ёй давялося жыць. Уцячы куды далей - варыянтаў іншага жыцця ў яе няшмат. Побач з жанчынай яе маленькія дзеці. Аднаго з сыноў забілі баевікі "Ісламскай дзяржавы. Яшчэ адзін сын зараз адправіўся на фронт.