У Мінскай вобласці працягваецца датэрміновае галасаванне. Камісіі працуюць як у буйных гарадах, так і ў невялікіх населеных пунктах. Знайсці свой участак дапаможа спецыяльны пошукавы сэрвіс.
А каб атрымаць бюлетэнь, пры сабе трэба мець пашпарт ці іншы дакумент, які пацвярджае асобу. Як выбіраюць дэпутатаў у Лагойскім раёне - падрабязнасці ў Алены Вітко.
Лагойскі раён
Датэрміновае галасаванне ў Мінскай вобласці - гэта звыш 850 участкаў. Графік агульны: адкрываюцца апоўдні і працуюць да 19 гадзін без перапынку. Так, толькі за першыя два дні свой бюлетэнь запоўнілі больш за 14,5 % выбаршчыкаў. Яўка расце і сёння.
І няхай Арцёму Палкіну ўсяго 18 гадоў, у электаральнай кампаніі ўжо ўдзельнічаў. Раней як артыст на святочных канцэртах, а сёння ўпершыню галасуе. Падзея адказная, а нагадваць пра дарослы выбар будзе сімвалічны падарунак.
Неабыякавасць да малой радзімы і такі просты ўдзел у развіцці гарадскога пасёлка. Сям'я Краўчанкі з Плешчаніц сёння таксама на ўчастку для галасавання. Для шматдзетных бацькоў гэта не проста традыцыя - клопат пра будучыню сына і дзвюх дачок.
Камфортнае жыллё і якасныя дарогі, а яшчэ даступная медыцына, высокі ўзровень адукацыі альбо спрыяльныя ўмовы працы. Прыярытэты могуць быць розныя. Знайсці свайго дэпутата дапамагаюць сустрэчы з выбаршчыкамі і інфармацыйныя стэнды. А з арганізацыйнымі пытаннямі падкажуць камісія і назіральнікі.
Усяго на тэрыторыі Лагойскага раёна сёлета арганізавалі 33 участкі. І каб выказаць сваё меркаванне мог кожны, на выбарчых лакацыях прадугледжана безбар'ернае асяроддзе. Гэта, напрыклад, спецыяльнае (паніжанае) месца для запаўнення бюлетэняў.
Галасаванне дома арганізуюць у нядзелю. Скарыстацца такім фарматам могуць тыя, хто па стане здароўя ці іншых прычынах не можа наведаць участак. Спецыяльныя спісы фарміруюць пасля звароту пісьмова альбо па тэлефоне. Заяўкі будуць прымаць і ў адзіны дзень галасавання - 25 лютага - да 18:00.
