Гандлёвы дом Беларусі можа з'явіцца ў Грузіі. Аб перспектывах супрацоўніцтва паміж краінамі ішла размова на гэтым тыдні ў Тбілісі. Віцэ-прэм'ер Беларусі Міхаіл Русы сустрэўся з грузінскімі бізнесменамі, якія і прапанавалі рэалізаваць праект у найбліжэйшы час. Яны ўжо пачалі пошук прыдатнага месца.
У наступным годзе плануюць запусціць на базе Грузінскага тэхналагічнага ўніверсітэта зборку магілёўскіх ліфтаў. Будзе арганізаваны ўвесь працэс: ад сэрвіснага і дыспетчарскага абслугоўвання да падрыхтоўкі кадраў. Да канца года паставім больш як 100 адзінак сельгастэхнікі. Урад Грузіі таксама зацікаўлены і ў падыходах нашай краіны ў рабоце са стратнымі сельгаспрадпрыемствамі.
Менш за год спатрэбілася, каб скараціць у нашай краіне лік неплацежаздольных арганізацый у два разы, стала менш і стратных прадпрыемстваў. Шмат у чым гэта заслуга 253-га ўказу, які дапамог фінансава аздаравіць сельгасарганізацыі. Зрэшты, ёсць і тыя, якія пагоршылі свой фінансавы стан. Праца з імі працягнецца. Тактыка Беларусі, паводле слоў Міхаіла Русага, не разваліць стратнае прадпрыемства, а дапамагчы яму ўстаць на ногі. Указ вырашана дапрацаваць. Будзе выдадзены новы дакумент, які адкажа практычна на ўсе пытанні па неплацежаздольных гаспадарках.
Якія глабальныя мэты ставім у АПК? І ці захаваем аб'ёмы паставак на расійскі рынак? Эксклюзіўнае інтэрв'ю з віцэ-прэм'ерам Беларусі глядзіце заўтра ў "Галоўным эфіры".
