Дарожныя службы Мінска асвяжаюць вуліцы і праспекты дзеля захавання цэласнасці пакрыцця

Дарожныя службы аператыўна рэагуюць на змяненні надвор'я - устойлівыя плюсавыя тэмпературы, таму спецтэхніка астуджвае асфальт на мінскіх транспартных артэрыях. Гэта неабходная працэдура для захавання цэласнасці дарожнага палатна. Пры павышаных тэмпературах асфальт пачынае дэфармавацца. Каб яго астудзіць, на дарогі выліваюць тоны вады з разліку на адзін квадрат мінімум адзін літр. Таксама такая тэхналогія дазваляе ачысціць мікрарасколіны ў пакрыцці ад смецця. 

Ілья Цвяткоў пра водныя працэдуры ад сталічных дарожнікаў. Як захаваць асфальт ад перагравання і не дапусціць дэфармавання палатна? Гэта добра ведаюць спецыялісты гарадскіх аўтадараў. З надыходам лета сталічныя магістралі кожны дзень прымаюць халодны душ. 

Як толькі слупкі тэрмометраў падымаюцца вышэй за 25 градусаў, палівальныя машыны дарожных службаў выязджаюць у горад. Асфальт прымае водныя працэдуры для ачысткі ад смецця і пылу, але ў першую чаргу для таго, каб знізіць яго тэмпературу.

Крытычная тэмпература для асфальтавага палатна - 50 градусаў. Пры такіх паказчыках пачынаюць плавіцца латкі і нядаўна залітыя швы ў шчылінах. З-за гэтага нават падчас суперсухога надвор'я дарога можа стаць вельмі слізкай, таму паліванне - гэта яшчэ і мера бяспекі для дарожнага руху. 

Паліваюць з разліку літр вады на квадрат дарожнага пакрыцця. Адной цыстэрны можа хапіць на ўчастак даўжынёй да 10 кіламетраў. Калі шырыня праезнай часткі  больш за 12 метраў, спецтэхніка ідзе па ўсіх палосах адначасова.

Матэрыял, з якога робяць дарогі, порысты. У мікрарасколінах асфальту назапашваецца дробнае смецце: пясок і каменне. Такая сумесь разбурае структуру палатна, яе вымываюць вадой пад высокім ціскам.

Акрамя палівання і ачысткі займаюцца таксама і рамонтам. Крытычная ямачнасць ужо ліквідавана. Зараз увага накіравана на лакальныя дэфармацыі на найбольш ажыўленых вуліцах.