На календары 1 лютага. І апошні зімовы месяц прынёс беларусам шэраг прыкметных навацый у сацыяльнай сферы: абноўлены галоўны арыенцір у разліку шэрагу дапамог і надбавак да пенсій - бюджэт пражытачнага мінімуму.
Так, з сённяшняга дня ён зафіксаваны на адзнацы амаль 297 рублёў, а гэта на тры працэнты перавышае папярэдні паказчык. І ўжо паводле традыцыі бюджэт падцягвае за сабой цэлы шэраг дапамог.
Па-першае - адначасовая. Яе прызначаюць пры нараджэнні дзіцяці. Сума на першага малога зараз складзе амаль 2 966 рублёў. Калі ў сям'і з’яўляецца другі, трэці – больш як 4 тысячы. Больш заплацяць і тым, хто чакае папаўнення: дапамога для жанчын, што своечасова сталі на ўлік Міністэрства аховы здароўя, вырасце да ўзроўню, абноўленага БПМ.
Акрамя таго, у сувязі з ростам амаль на 9 працэнтаў сярэднемесячнай зарплаты працаўнікоў у рэспубліцы за 4-ты квартал мінулага года павялічылася і штомесячная дапамога па доглядзе дзіцяці ва ўзросце да трох гадоў. На першага - будуць выплачваць 540 рублёў, на другога і наступных - 617 рублёў, на дзіця-інваліда да 3 гадоў - 694 рублі.
У Беларусі павялічваюцца пенсіі, дапамогі і іншыя сацыяльныя выплаты
Таксама выраслі і даплаты да пенсій: тым беларусам, каму ўжо 75 гадоў, дадаваць будуць амаль 56 рублёў, для людзей ва ўзросце 80 і старэйшым – больш як 74 рублі. Гэтыя сумы зафіксуюць на квартал да канца красавіка.
