Археалагічныя групы, тэатральныя студыі і відэакласы – мінскія ўстановы адукацыі прапануюць творчым навучэнцам новыя гурткі па інтарэсах. У 32-й школе сёлета з'явіцца сучасны цір. А ў 24-й плануюць стварыць уласны тэлецэнтр. Як школьніку знайсці занятак для душы, ведае Ян Пашкевіч.
Максім Баранаў сам сабе рэжысёр, відэааператар і сцэнарыст. На паляванне за ўдалымі кадрамі гарадскіх краявідаў хлопец амаль штодня выходзіць разам з аднадумцамі са школьнага гуртка відэа- і фотаздымкі. Дакументальныя стужкі, гумарэскі або рэаліці-шоу аб роднай школе – пачаткоўцы-акцёры і рэжысёры вучацца працаваць у розных жанрах.
Сёлета ж кінематаграфічны гурток ператворыцца яшчэ і ў школьны тэлецэнтр. Не толькі кінастудыя, але і зала для прагляду прэм'ер – у 24-й сталічнай школе адкрылі і ўласны кінатэатр. Падчас спецыялізаваных сеансаў тут ладзяць гульнявыя заняткі для малодшых класаў. Музычнае ж суправаджэнне ўсіх школьных святаў ствараюць у студыі вакалу на прафесійным сучасным абсталяванні.
Пачаткоўцаў-археолагаў жа запрашае гурток па інтарэсах 32-й сталічнай школы. Шукальнікі скарбаў гісторыі некалькі разоў на год выязджаюць на раскопкі ў знакамітыя мясціны Беларусі. Са старажытных артэфактаў у школе стварылі ўласны краязнаўчы музей.
Трэнажорная і гімнастычная залы, футбольны і баскетбольныя палі – школа мае і ўласны спартыўны комплекс. Тут пад кіраўніцтвам прафесійных трэнераў свае ўменні раскрываюць будучыя футбольныя і баскетбольныя таленты.
А з новага вучэбнага сезона ў школе адкрыюць і сучасны цір. Трэніроўкі тут пачнуцца ужо з 1 верасня, а адначасова змогуць займацца да 12 спартсменаў.
Урокі па робататэхніцы, тэатральныя і харэаграфічныя студыі – новы набор у гурткі па больш чым 20 напрамках сталічныя школы пачнуць ужо з 1 верасня. Некаторыя ж установы адукацыі стануць раённымі цэнтрамі творчасці. Каб займацца тут любімым хобі, неабавязкова быць навучэнцам школы, хопіць толькі жадання.
