У праваслаўных сёння Куцця. Самая шматлікая канфесія Беларусі разам з усім усходнехрысціянскім светам рыхтуецца сустрэць адно з самых светлых і значных святаў - Нараджэнне Хрыстова. Каля 2 тысяч праваслаўных прыходаў па ўсёй краіне рыхтуюцца да ўрачыстай літургіі. Завяршаецца Піліпаўскі пост. Пасля паўночы і сустрэчы Віфлеемскай зоркі свята ўступіць у сваю сілу. Праваслаўныя вернікі, манаства і святарства ва ўрачыстасць укладваюць асаблівае пачуццё.
Цэнтрам святочных набажэнстваў у Мінску стане Свята-Духаў кафедральны сабор. Святочную літургію ўзначаліць Мітрапаліт Мінскі і Заслаўскі Веніямін Патрыяршы Экзарх усяе Беларусі. Прамую трансляцыю службы на свята Нараджэння Хрыстовага па традыцыі пакажа Белтэлерадыёкампанія. Пачатак трансляцыі - пасля праграмы "Панарама" ў 21:50. А заўтра, святочнай раніцай, у 06:25 Уладыка Веніямін звернецца да вернікаў з віншавальным словам у тэлеэфіры "Беларусь 1".
