Беларусь гасцінна пашырае межы бязвізавай тэрыторыі. Ужо ў лістападзе ў Гродзенскай вобласці адкрытымі для турыстаў стануць яшчэ 5 раёнаў. У цэлым жа ў Гродзенскім рэгіёне рэжым бязвізу ўпершыню пачаў працаваць 26 кастрычніка 2016. За 3 гады Гродна і беларускую частку Аўгустоўскага канала наведалі амаль 240 тысяч турыстаў больш як з 60 краін. Палюбавацца прыгажосцю прыроды і горада за 2017 змаглі 50 тысяч турыстаў, за 2018 - 94 тысячы і за гэты год - ужо 95 тысяч чалавек.
Бязвізавы рэжым для замежных турыстаў у Брэсцкім рэгіёне стартаваў з 1 студзеня 2018 года. Грамадзяне 80 краін атрымалі магчымасць 10 дзён знаходзіцца ў турысцка-рэкрэацыйнай зоне "Брэст". За першы год працы бязвізу рэгіён прыняў 18 тысяч 400 замежных турыстаў. А на сённяшні дзень гэта ўжо больш за 42 тысячы чалавек. Роўна праз месяц бязвізавыя тэрыторыі Брэсцкага і Гродзенскага рэгіёнаў аб'яднаюць у адну згодна з указам Прэзідэнта.
А з далучэннем да бязвізу яшчэ пяці раёнаў Гродзенскай вобласці даступнымі для наведвання турыстаў стануць шматлікія помнікі архітэктуры. Сярод іх Лідскі замак, касцёл Візітацыі Дзевы Марыі ў Вялікай Бераставіцы, Дом Баграціёна ў Ваўкавыску, драўляны касцёл Адшукання Святога Крыжа ў вёсцы Жырмуны Воранаўскага раёна, царква Нараджэння Багародзіцы ў вёсцы Мураванка Шчучынскага раёна.
Што яшчэ змогуць убачыць турысты на Гродзенскай зямлі - рэпартаж Юрыя Карняловіча.
Бізнесмен Генадзь Конан у сваім прыватным этнаграфічным музеі гасцей сустракае асабіста. Гісторыю Лідскага краю па крупінках збіраў па навакольных вёсках. Прызнаецца, што побыт, фальклор і традыцыі мясцовых жыхароў за пяць гадоў вывучыў дасканала.
Пачыналася ўсё з куплі напаўразбуранага млына XIX стагоддзя. Аднавіў будынак, а экспанаты сталі прыносіць самі мясцовыя жыхары. Сёння тут тры залы, кафэ, месцы адпачынку на прыродзе. Праходзяць творчыя мерапрыемствы, рыцарскія фестывалі. Стары млын стаў брэндам раёна, уключаным ва ўсе турыстычныя маршруты. Чакаюць тут і іншаземцаў. Вялікія надзеі ў бізнесмена на ўключэнне Ліды ў бязвізавую зону. Ужо з лістапада на аб'екце запланаваны экскурсіі для палякаў і літоўцаў.
Даступнымі для турыстаў стануць дзясяткі помнікаў архітэктуры, аграсядзіб і зон адпачынку Лідскага раёна. На кожным аб'екце ўжо распрацоўваецца асобная праграма на замежных мовах, падбіраецца персанал. Рыхтуецца сустрэць бязвізавых турыстаў і Лідскі замак XIV стагоддзя. Гэта гістарычная жамчужына рэгіёна. Штогод сюды прыязджаюць каля 50 тысяч гасцей, з якіх палова іншаземцы. Бязвіз, упэўнены лідчане, дазволіць павялічыць наведвальнасць замка ў некалькі разоў. Акрамя традыцыйнага гістарычнага складальніка экскурсій, тут падрыхтавалі сюрпрызы і аматарам класікі. Актыўна развіваюць падзейны турызм.
Да прыёму іншаземцаў рыхтуецца ўся Ліда. Актыўна развіваецца сфера абслугоўвання, вытворчы турызм. Галоўная задача, каб госці захацелі вярнуцца сюды яшчэ не адзін раз.
Бязвізавымі ў лістападзе стануць адразу пяць раёнаў Гродзенскай вобласці. І ў кожным з іх ідзе актыўная падрыхтоўка да сустрэчы іншаземцаў. Для камфорту адпачывальнікаў распрацаваны нават мабільныя дадаткі, якія дазволяць гасцям самім складаць турыстычныя маршруты. Згодна з самымі сціплымі падлікамі, ужо ў наступным годзе рэгіён наведаюць да паўмільёна бязвізавых турыстаў.
