Прадстаўнікі фізкультурна-спартыўнага таварыства "Дынама" і выратавальнікі Брэсцкага абласнога ўпраўлення МНС аб’ядналіся ў барацьбе за здароўе і бяспеку падрастаючага пакалення. З урачыстага пасвячэння школьнікаў у юныя дынамаўцы ў Брэсцкай вобласці распачалася рэспубліканская акцыя "Не пакідайце дзяцей адных!".
Урачыстая клятва, пасведчанне і блакітны шалік цяпер частка вялікай дружнай дынамаўскай сям’і, якая налічвае шмат выратавальнікаў. Спорт і бяспека заўсёды побач - упэўненыя арганізатары акцыі "Не пакідайце дзяцей адных". Разам з азамі спартыўнага майстэрства юныя дынамаўцы будуць спасцігаць і навуку бяспечных паводзін. Побач з дзецьмі - іх бацькі. Гэта асабліва важна - адзначаюць у МНС, таму што менавіта яны - галоўная аўдыторыя акцыі. Яе задача - прыцягнуць бацькоўскую ўвагу да праблемы траўматызму і гібелі дзяцей, якія застаюцца без нагляду дарослых.
Як правільна паводзіць сябе ў небяспечных сітуацыях? Не атрымаць цеплавы ўдар у спякоту, не сустрэцца з маланкай у навальніцу, не стаць ахвярай воднай стыхіі? Аб гэтым і не толькі юным дынамаўцам расказалі выратавальнікі падчас інтэрактыўнай гульні "Вучым правілы бяспекі разам". Тут жа дзеці змаглі пазнаёміцца з рознымі відамі пажарнай спецтэхнікі і нават прымерыць на сябе выратавальніцкую форму. Другі этап рэспубліканскай акцыі прадугледжвае сустрэчы супрацоўнікаў МНС з маладымі і будучымі мамамі.
Выратавальнікі наведаюць установы аховы здароўя, кабінеты здаровага дзіцяці, школы мацярынства.
