Праверка гатоўнасці да вясенне-палявых работ. Асаблівая ўвага тэхнічных інспектараў Федэрацыі прафсаюзаў падрыхтоўцы тэхнікі, забеспячэнню работнікаў спецыяльнай вопраткай, а таксама арганізацыі гарачага харчавання. Будучыя цырульнікі і пекары паўночнага рэгіёна краіны прайшлі рэгіянальны адборачны тур конкурсу прафесійнага майстэрства WorldSkills Belarus - 2018. А студэнткі ВНУ змагаліся за права насіць тытул “Каралева-Вясна - 2018”. Больш падрабязна ў наступным дайджэсце.
Расказвае Марына Раманоўская.
Маніторынг гатоўнасці сельскагаспадарчых прадпрыемстваў да вясенне-палявых работ праводзяць тэхнічныя інспектары Федэрацыі прафсаюзаў. Асаблівая ўвага падрыхтоўцы тэхнікі, забеспячэнню работнікаў спецыяльнай вопраткай і абуткам, належнымі бытавымі ўмовамі, а таксама арганізацыі гарачага харчавання. Дапамогу аграрыям падчас вясенне-палявых работ акажуць навучэнцы профільных каледжаў. Працаваць у полі таксама будуць спецыялісты з гарадоў і райцэнтраў.
Будучыя цырульнікі і пекары з паўночнага рэгіёна краіны прайшлі рэгіянальны адборачны тур конкурсу прафесійнага майстэрства WorldSkills Belarus - 2018. За перамогу змагаліся некалькі дзясяткаў удзельнікаў. Галоўная ўмова - узрост канкурсанта не больш за 22 гады. Пераможцы прадставяць вобласць на рэспубліканскім этапе конкурсу.
Прыгажосць і грацыя. У Віцебску выбралі прадстаўніцу паўночнага рэгіёна на рэспубліканскім конкурсе “Каралева-Вясна - 2018”. Пераможніцай рэгіянальнага адбору стала студэнтка Віцебскага дзяржаўнага ўніверсітэта ім. П.Машэрава Марыя Салаўёва. Удзельніцы прадэманстравалі сцэнічную культуру, уменне трымацца на публіцы, камунікабельнасць, веданне правіл этыкету, пачуццё гумару, інтэлектуальныя і творчыя здольнасці.
Стартаваў другі этап продажу білетаў на XXVII Міжнародны фестываль мастацтваў “Славянскі базар у Віцебску". Квіткі даступныя на ўсе праекты ў Летнім амфітэатры. Вядома, што ў праграме з'явіліся новыя канцэрты. Сольна выступяць спявачка Зара, Кубанскі казачы хор, адбудзецца "Ноч гумару". Міжнародны форум пройдзе з 12 па 16 ліпеня.
