Новыя напрамкі бязвізавага наведвання Беларусі. Папулярнасць сярод замежных гасцей набіраюць медыцынскія падарожжы ў нашу краіну. На гэтым тыдні, напрыклад, хірургі гродзенскай бальніцы правялі аперацыю грамадзяніну Польшчы. Працэдура складаная, але дзякуючы малаінвазіўнай методыцы заняла ўсяго дзве гадзіны. Хто ж едзе ў нашу краіну лячыцца і ў чым перавагі беларускіх клінік, высветліў Дзмітрый Смірноў.
Мацей і Адам прыехалі ў Гродна не ўпершыню, але гэтым разам не па экскурсіі. Грамадзяне Польшчы, заклапочаныя станам свайго здароўя, свядома выбралі беларускую клініку. Раней яны ў складзе турыстычнай групы наведалі Гродзенскую клінічную бальніцу. Пазней вярнуліся сюды ўжо ў якасці пацыентаў.
Эксперты кажуць: за апошні год, што ў Гродзенскім раёне дзейнічае бязвізавы рэжым, медыцынскі турызм паказвае значны рост. Толькі ў Гродзенскай абласной бальніцы колькасць медпаслуг перавысіла 110%.
Канкурыраваць гродзенскім медыкам прыходзіцца з еўрапейскімі і расійскімі клінікамі. Прыярытэтныя напрамкі - лячэнне захворванняў органаў зроку, лор-паталогій, пластыка і апошнім часам - лапараскапічная хірургія. Дарэчы, на такую аперацыю і прыехалі польскія грамадзяне.
Аперацыя гэтая хоць і складаная, але малаінвазіўная. Іншымі словамі, польскія пацыенты будуць дома ўжо на гэтым тыдні.
Медыкі сцвярджаюць: пяцідзённы бязвізавы рэжым - найлепшы фундамент для іміджавага і эканамічнага росту беларускіх клінік.
Так, за апошні год геаграфія пацыентаў Гродзенскай клінічнай бальніцы істотна пашырылася. Найбольш частыя госці – самыя блізкія суседзі - жыхары Польшчы і Літвы. Але сярод пацыентаў былі і грамадзяне Іспаніі, Францыі, Нідэрландаў і яшчэ некалькіх краін Усходу і Афрыканскага кантынента.