У Гомельскай вобласці на тыдні адкрылі 42 дзіцячы дом сямейнага тыпу. Сям'я засялілася ў поўнасцю ўладкаваны дом. У ім усё неабходнае - мэбля, сантэхніка, бытавыя электратавары. Некаторыя з падарункаў, напрыклад, новыя камп’ютары сям'і прэзентавалі непасрэдна на ўваходзінах. З падрабязнасцямі Ганна Кавалёва.
Будаўніцтва гэтага двухпавярховага катэджа пачалося летам. Сёння дом цалкам гатовы да сустрэчы з новымі гаспадарамі. Імі стануць Наталля і Мікалай Агафонавы і пяцёра іх прыёмных дзяцей.
Яны вырасцілі родную дачку і ўжо двойчы сталі дзядулем і бабуляй. Узяць прыёмных дзяцей прапанавала Наталля. Муж ідэю падтрымаў. Упершыню сваіх будучых бацькоў дзеці ўбачылі ў верасні і адразу назвалі мамай і татам.
Старэйшыя дзеці кажуць, што іх навагоднія жаданні здзяйсняюцца ўжо зараз. За дзень да афіцыйнага адкрыцця ў новым доме сям'я Агафонавых ўпершыню сабралася ў поўным складзе. Дарэчы, у найбліжэйшы год яна папоўніцца яшчэ пяццю дзецьмі.
Лізавета Мурашка, выхаванка дзіцячага дома сямейнага тыпу:
"Ставімся адно да аднаго добра, называем "мама" і "тата". Са з'яўленнем маіх новых мамы і таты ў маім жыцці змянілася ўсё. Гэта будзе першы Новы год, калі мы збяромся ўсёй сям'ёй разам".
Дзіцячы дом сямейнага тыпу ў Ветцы - 42-і ў рэгіёне. Катэдж плошчай больш за 190 квадратных метраў абсталяваны ўсёй неабходнай мэбляй, тэхнікай і нават сістэмай відэаназірання.
Сяргей Парошын, начальнік упраўлення адукацыі Гомельскага аблвыканкама:
"Школ-інтэрнатаў у нас ужо няма які год запар. Мы выканалі даручэнне Прэзідэнта Рэспублікі Беларусь аб ліквідацыі школ-інтэрнатаў агульнага тыпу, у нас ужо іх не існуе".
У Гомельскай вобласці ў дзіцячых дамах сямейнага тыпу выхоўваюцца каля 300 хлопчыкаў і дзяўчынак. На наступным тыдні ў свой новы дом у Чачэрскім раёне пераедуць яшчэ шасцёра дзяцей са сваімі прыёмнымі бацькамі.
