Значнымі падзеямі напоўненыя не толькі выхадныя, але і будныя. Горад працягвае прымаць падарункі з нагоды 750-годдзя - гэтым разам новыя машыны хуткай дапамогі, а яшчэ выпуск афіцэраў, міжнародная эстафета "Бег міру". Яркія моманты тыдня - у наступным дайджэсце.
Расказвае Андрэй Ястрабаў: Тры аўтамабілі хуткай дапамогі ад горада і адзін сучасны рэанімабіль, укамплектаваны ўсёй неабходнай апаратурай, - ад Беларусбанка. А яшчэ грашовыя сертыфікаты. Магілёў працягвае прымаць падарункі з нагоды юбілею - 750-годдзя. Гэтым разам іх атрымала бальніца №1. Ключы ад машын ва ўрачыстай атмасферы ўласна ўручыў вадзіцелям мэр горада з адзіным пажаданнем - як мага хутчэй прыходзіць на дапамогу людзям.
На гэтым падарункі не скончыліся: на базе бальніцы пасля рэканструкцыі адкрылася аддзяленне аднаўленчага лячэння. Штогод атрымліваць медыцынскую дапамогу тут змогуць каля трох тысяч пацыентаў.
У Кастрычніцкім раёне Магілёва адкрыўся першы ў вобласці крызісны дом. У ім адначасова могуць знаходзіцца дзве сям’і, якія апынуліся ў цяжкай жыццёвай сітуацыі. Тут ёсць усё неабходнае для часовага пражывання: кабінет для заняткаў, месца для адпачынку, кухня з усёй неабходнай тэхнікай.
Урачысты выпуск маладых афіцэраў прайшоў у Магілёўскім інстытуце Міністэрства ўнутраных спраў. Сёлета лейтэнанцкія пагоны ўпрыгожылі кіцелі яшчэ 202 выпускнікоў факультэта міліцыі. У тым ліку і тых, хто атрымаў веды ўпершыню па новай інстытуцкай праграме. Дыпломы аб вышэйшай адукацыі атрымалі і 139 курсантаў завочнага аддзялення. Далей яны накіруюцца для праходжання службы.
Магілёўская вобласць прымала 30-ю міжнародную эстафету "Бег міру". Дарэчы, аўтар ідэі гэтага праекта - Шры Чынмой - вядомы грамадскі дзеяч, міратворац, спартсмен. За 30 гадоў эстафеты мільёны бегуноў планеты прабеглі з факелам міру і сяброўства 600 000 км і наведалі больш за 150 краін. Сёлета завіталі да выхаванцаў лагера "Крыніца" ў Шклоўскім раёне. Па Беларусі бегуны пераадолеюць 1900 км. І далучыцца да эстафеты мае магчымасць кожны.
