Такім чынам, планка ў мільярдны тавараабарот пастаўлена. Акрамя таго, Беларусь будзе садзейнічаць Пакістану ў пытаннях стварэння зоны свабоднага гандлю з Еўразійскім эканамічным саюзам. Бакі дамовіліся і актыўна нарошчваць вытворчую кааперацыю. Аб сур'ёзнасці намераў гаворыць адкрытасць дзвюх краін і рэгулярныя візіты на вышэйшым узроўні. Трывалая база Беларусь - Пакістан была ўмацавана і падчас наведвання Аляксандра Лукашэнкі ў маі Ісламабада. Арыенцір на прадукцыйнае партнёрства замацаваны і дарожнай картай, якая была падпісана напярэдадні. Пра што яшчэ дамовіліся сёння Беларусь і Пакістан - падрабязнасці ў Андрэя Лапцёнка.
Камусьці здасца дзіўным, але аграрна-індустрыяльны Пакістан сярод краін, якія нараўне з краінамі БРІКС прэтэндуюць заняць месца ў клубе наймацнейшых эканомік свету XXI стагоддзя. Згодна з прагнозамі брытанскіх эканамістаў, наступнае пакаленне маладых пакістанцаў будзе жыць у краіне з ВУП у 3,5 трыльёна долараў, што амаль раўназначна бягучаму ВУП Германіі. Іншымі словамі, выходзячы на маштабнае партнёрства зараз, Беларусь фактычна займае гэты рынак.
Па структуры эканомікі Пакістан для нас партнёр ідэальны. Перспектывы і маштаб адчуваюцца ўжо ў колькасці насельніцтва, што супастаўляецца з Еўразійскім эканамічным саюзам. Напярэдадні, адразу пасля падпісання дарожнай карты, гэта адзначае і беларускі прэм'ер, абяцаючы, што Беларусь будзе садзейнічаць Пакістану ў пытаннях стварэння зоны свабоднага гандлю з Еўразійскім эканамічным саюзам. А само падпісанне дарожнай карты - унікальная магчымасць перайсці да рэалізацыі канкрэтных праектаў.
Два дні шчыльных перамоў у рамках ужо трэцяга афіцыйнага візіту - яшчэ адзін дадатковы імпульс. Ужо на бягучым двухбаковым бізнес-форуме ўдзельнікі самі адзначаюць, што пажаданне беларускага Прэзідэнта і прэм'ера Пакістана - не захапляцца чыстым гандлем, а нарошчваць вытворчую кааперацыю - прадпрымальнікі выконваюць. Невыпадкова стварэнне СП і зборачных вытворчасцяў прапісана ў дарожнай карце сярод галоўных пунктаў.
Вынікі візіту яшчэ трэба будзе аналізаваць, зрэшты, як адзначалі бакі на перамовах, не хлебам адзіным. У агульнай плоскасці інтарэсаў - пытанні міру ў палітыцы, адукацыйны і культурны абмен. У пацвярджэнне яшчэ адна знакавая падзея - адкрыццё ў Нацыянальнай бібліятэцы Пакістана Беларускага інфармацыйнага цэнтра.
Акрамя таго, беларускі прэм'ер прыняў удзел у цырымоніі пасадкі дрэва ў парку "Шакарпарыян" і зрабіў запіс у кнізе ганаровых гасцей. Сёння ўрадавая дэлегацыя перамесціцца ў Стамбул, дзе адбудзецца беларуска-турэцкі інвестфорум.
