У Палацы Незалежнасці гаварылі аб эфектыўнасці экспарту нафтапрадуктаў

Што ж датычыцца эфектыўнасці экспарту нафтапрадуктаў, то трэба сказаць, што зараз увесь нафтахімічны комплекс  працуе ў няпростых умовах. Падатковы манеўр асноўнага пастаўшчыка сыравіны  не пайшоў на карысць рэспубліканскаму бюджэту. Таксама і заводы, арыентаваныя на перапрацоўку, адчуваюць розніцу. Каб узмацніць свае пазіцыі, патрэбныя альтэрнатыўныя варыянты паставак. Чым больш апор - тым лепш. Мэта - закупляць на расійскім рынку 30-40% ад неабходных аб'ёмаў нафты. 

Ёсць практычна гатовыя кантракты. Кіраўнік Белнафтахіма па выніках нарады расказаў журналістам аб магчымых шляхах альтэрнатыўных паставак. Прапрацоўваюцца не толькі патэнцыяльныя пастаўшчыкі, але і лагістыка. Схема "порт - чыгунка" - не адзіная, адзначыў кіраўнік канцэрна. У той жа час Беларусь працягвае перамовы з Расіяй аб пастаўках нафты. Таксама стала вядома, што прыпыненне экспарту нафтапрадуктаў з нашай краіны ўжо адмененае. 

Андрэй Рыбакоў, старшыня канцэрна "Белнафтахім": "Гэта быў невялікі перыяд прыпынення. Прыпыненне адмененае. Хоць мы пакуль не выйшлі на тыя аб'ёмы экспарту, якія прапісваліся намі ў бізнес-плане, але сам экспарт у нас не пад забаронай". Андрэй Рыбакоў растлумачыў, што для любой нафтаперапрацоўкі ёсць пэўны найболей эфектыўны радыус рэалізацыі прадукцыі. "Далей лагістыка пачынае ўступаць у сілу, - адзначыў ён. - Вядома, найбліжэйшыя рынкі будуць самыя эфектыўныя. Далейшая рэалізацыя - праз парты, на далёкі перыметр - будзе ўжо зыходзіць з кан'юнктуры таго рынку, на які мы будзем пастаўляць. І наогул, з кан'юнктуры сусветных цэн на нафтапрадукты. Але самыя эфектыўныя рынкі - гэта нацыянальны і найбліжэйшыя. На іх і будзем у першую чаргу арыентавацца". 

Нагадаем, з пачатку года расійскія кампаніі  спынілі пастаўкі сыравіны на беларускія НПЗ. Прычынай сталі коштавыя рознагалоссі. Яшчэ ў канцы снежня Аляксандр Лукашэнка  даручыў заключыць альтэрнатыўныя кантракты  для бесперабойнай працы беларускіх заводаў. Так, ужо заўтра  ў літоўскі порт Клайпеда  будзе пастаўленая партыя нарвежскай нафты. 80 тысяч тон сыравіны  прызначаныя для перапрацоўкі на наваполацкім "Нафтане".