Новы кіраўнік гандлёвай галіны Беларусі сёння афіцыйна прадстаўлены на пасадзе. Нагадаем, Мінгандаль стаў адзіным ведамствам, якое атрымала новага кіраўніка згодна з адпаведным указам Прэзідэнта. Узначаліў міністэрства 49-гадовы Уладзімір Калтовіч.
Зрэшты, для Мінгандлю гэта фігура не новая. У паслужным спісе новага кіраўніка ведамства - пасады намесніка і першага намесніка міністра гандлю. З 2010 года Калтовіч - намеснік старшыні Мінскага гарвыканкама. Аж да новага прызначэння працуе ў беларускім пасольстве ў Маскве. На працягу трох гадоў - са снежня 2012 года - курыруе пытанні гандлю.
На прадстаўленні кіраўніка Мінгандлю Прэм'ер-міністр Беларусі Андрэй Кабякоў адзначыў, што ведамства павінна вырашаць як ужо традыцыйныя задачы - садзейнічаць насычэнню рынку айчыннымі таварамі і праводзіць антыманапольную палітыку, так і паспяхова працаваць у новых для краіны ўмовах адзінай эканамічнай прасторы.
Уладзімір Калтовіч, Міністр гандлю Беларусі: "Новае - гэта ўмовы працы рынку ў сістэме ЕўрАзЭС, забеспячэнне кантролю якасці, адпаведнасці тэхнічным нарматыўным патрабаванням тавара. Натуральна, захаванне і павышэнне ўзроўню культуры абслугоўвання пакупнікоў, раяніраванне гандлю, захаванне балансу інтарэсаў дзяржавы і прыватнага бізнесу. Ну і вядома, як гавораць, кадры вырашаюць усё, таму ўзровень падрыхтоўкі кадраў - гэта адна з найважнейшых задач".
Зрэшты, кадраваму пытанню галіны сёння надалі асаблівую ўвагу. Кіраўнік урада падкрэсліў, што падрыхтоўка кадраў у цэлым павінна адпавядаць сучасным патрабаванням. Гаворка ішла аб тэхналагічных вырашэннях у гандлёвай сферы. Новаму кіраўніку ведамства было даручана ўвесці і адрэгуляваць усе спосабы дастаўкі тавара да спажыўца.