Свае магчымасці прапанавалі 140 айчынных кампаній і прадпрыемстваў. Якім чынам Беларусь і Грузія збіраюцца павялічыць тавараабарот да 200 мільёнаў долараў ужо ў наступным годзе - даведаўся Аляксей Адашкін.
Беларуская выстава ў Тбілісі праходзіць у прамым сэнсе з шырокім размахам. Тут усё тое, што наша краіна можа прапанаваць гэтай закаўказскай рэспубліцы. Ад беларускай бульбы, вырашчанай у Грузіі, і да беларускіх трактароў, ужо мясцовай вытворчасці. Такі форум з навочнай дэманстрацыяй магчымасцяў выгаднага супрацоўніцтва выклікаў небывалую цікавасць з боку грузінскіх бізнесменаў.
Гэтым летам у прыгарадзе Тбілісі пачалі збіраць беларускія трактары. У мадэльным шэрагу - чатыры віды машын. Кампактныя і пры гэтым даступныя па кошце. Тэхніка з Сінявокай дапамагае Грузіі адраджаць сяло. Пры гэтым атрымліваецца, што адначасова ажывае і мясцовая прамысловасць.
Амаль паўтары сотні кампаній і прадпрыемстваў з Беларусі занялі на найбліжэйшыя некалькі дзён увесь цэнтр Expo Georgia. Такую маштабную выставу адкрывалі прэм'ер-міністр Грузіі і беларускі віцэ-прэм'ер. Чыноўнікі высокага рангу сталі і першымі наведвальнікамі, якія змаглі агледзець і нават паспытаць экспанаты.
Сумесны тавараабарот паміж краінамі сёння б'е рэкорды. За паўгода наш экспарт у краіну хінкалі і хачапуры вырас у тры разы. У планах - павялічыць штогадовы аб'ём гандлю амаль у чатыры разы.
Адносіны паміж Мінскам і Тбілісі сёння развіваюцца як ніколі імкліва. Каталізатарам сталі кантакты на вышэйшым узроўні. Летась Прэзідэнт Аляксандр Лукашэнка наведаў упершыню Грузію. Ужо ў пачатку 2016-га прэм'ер-міністр Георгій Квірыкашвілі пабываў у Мінску. Тым часам у Тбілісі літаральна на мінулым тыдні адкрылася і беларускае пасольства.
Пакуль аснова беларускага экспарту ў Грузію - лекі, прадукты і ўгнаенні. У зваротным кірунку атрымліваем гародніну, мінеральныя воды і віна. Мяркуючы па настроі бізнесменаў з гэтай паўднёвай краіны, хутка тут на прылаўках істотна пашырэе асартымент тавараў з Сінявокай.
Беларускія вытворцы ў гэтай вінаробнай краіне нават прымудраюцца займаць сваю нішу і на рынку моцных напояў. Ужо другі кантракт падпісаны па пастаўцы айчыннай гарэлкі ў Грузію.
Сёння ж у Тбілісі прайшоў і беларуска-грузінскі бізнес-форум. У ім прынялі ўдзел прадстаўнікі трохсот кампаній. Хтосьці толькі абмяняўся візітоўкамі. А шматлікія ўжо падпісвалі кантракты.
Серыю ўжо міждзяржаўных дакументаў змацавалі подпісамі на пасяджэнні міжурадавай камісіі. У прыватнасці, Магілёўская вобласць дамовілася аб супрацоўніцтве з аўтаномнай Аджарыяй. Асобны дакумент прысвечаны і кантактам у сферы турызму. Паміж краінамі штодня лятаюць самалёты, і гэта таксама збліжае - як падарожнікаў, так і бізнесменаў.
