Уборачная-2020 у Мінскай вобласці на фінішы

Сельгасарганізацыі Мінскай вобласці завяршаюць уборку каласавых збожжавых культур. Агульны намалот перавысіў 1 990 000 тон. З амаль двухмільённага каравая самыя важкія пазіцыі ў Слуцкага, Мінскага і Капыльскага раёнаў. Гэтая тройка фарміруе амаль чвэрць усяго абласнога валу збожжа. Пры гэтым самая высокая ўраджайнасць - у аграрыяў Нясвіжа: 67 цэнтнераў з гектара. Усё сабранае збожжа паэтапна трапляе на перапрацоўку на камбінаты хлебапрадуктаў. Найбуйнейшыя з іх у Слуцку, Барысаве, Мар'інай Горцы, а таксама сталіцы.

Сяргей Ляўковіч, першы намеснік старшыні Мінаблвыканкама: "40 цэнтнераў з гектара - гэта тая мінімальная планка, з якой павінна працаваць Мінская вобласць. І для эканамічнай эфектыўнасці працы ў сельскай гаспадарцы нам неабходна мець гэты вынік. Ёсць куды расці, і ёсць яшчэ рэзервы ў Мінскай вобласці. Гэта і назапашванне мінеральных угнаенняў, закупка тэхнікі і гэтак далей, гэтая праца праводзіцца. Галоўная задача - выгадна прадаць збожжа для птушкагадоўлі, свінагадоўлі. Для таго каб нашы людзі маглі працаваць і атрымліваць добрую зарплату".

У гэтыя дні аграрыі таксама працягваюць уборку грэчкі і проса. А на чарзе і ўборка кукурузы.