"Слаўкалій" будзе рэалізоўваць сваю прадукцыю выключна праз Беларускую калійную кампанію. Аб гэтым сёння заявіў кіраўнік савета дырэктараў Міхаіл Гуцэрыеў. Паводле яго слоў, на рынку з'яўляецца новы гулец сусветнага ўзроўню па здабычы і перапрацоўцы калійнай руды. Акрамя традыцыйных тэхналогій тут будуць выкарыстоўвацца і цалкам новыя. Так, упершыню ў свеце хуткасць свідравання складзе тры метры за суткі.
Праходкай шахтных ствалоў на ўчастку будаўніцтва Нежынскага горна-ўзбагачальнага камбіната зоймуцца нямецкія кампаніі. Кітайскія інвестары будуць адказваць за энергазабеспячэнне пляцоўкі і пастаўку абсталявання. "Слаўкалій" падпісаў сёння дагавор аб супрацоўніцтве. Інвест-праект - гэта добры прыклад дзяржаўна-прыватнага партнёрства. Агульны кошт праекта - два мільярды долараў. Пасля выхаду на поўную магутнасць прадпрыемства будзе прадаваць да двух мільёнаў тон калію за год.
Міхаіл Гуцэрыеў, старшыня савета дырэктараў ЗТАА "Слаўкалій":
"Мы будзем супрацоўнічаць з усімі, але працаваць будзем праз БКК. Таму што БКК - гэта беларуская кампанія, "Беларуськалій" і "Слаўкалій" - таксама беларускія кампаніі. Мы партнёры. Будзе цікава працаваць з "Уралкаліем" або з Канадай, значыць, будзем працаваць, але БКК - гэта наша кампанія, праз якую будзем прадаваць".
Ёхен Грайнахер, гендырэктар кампаніі Deilmann-Haniel GMHH:
"Мы разлічваем на доўгатэрміновае супрацоўніцтва з Беларуссю. Пакуль наш праект разлічаны прыкладна на пяць гадоў: будзем будаваць у вас руднік. Плануем прыцягваць да працы ў тым ліку і вашых пастаўшчыкоў".
Старт праекту далі два гады назад. У верасні 2015-га Кіраўнік дзяржавы Аляксандр Лукашэнка і бізнесмен Міхаіл Гуцэрыеў урачыста заклалі капсулу ў знак пачатку будаўніцтва.
Гэта будзе другое прадпрыемства ў Беларусі па здабычы калійнай руды і вытворчасці калійных угнаенняў.