Інтэнсіўнае сонца і багатыя дажджы! Чэрвень, паводле слоў аграрыяў, ідэальны месяц для нарыхтоўкі кармоў. Дзякуючы надвор'ю адзін ураджай плаўна пераходзіць у іншы. На палях агракамбіната «Ждановічы» зараз працуюць прэс-падборшчыкі. За дзень адна машына нарыхтоўвае да двухсот рулонаў.
Кармы ў стрэйч-плёнцы літаральна як кансервы. Распакаваць такую можна і праз год. Пры гэтым усе травы застануцца такімі ж сакавітымі, як і зараз.
Час інтэнсіўнай корманарыхтоўкі ў АПК
Адзін з папулярных палявых «букетаў» - люцэрна, фестулоліум і цімафееўка. Трыа дае найлепшую якасць корму для сельгасжывёл.
Паступова за сезон такія рулоны, як і сянажныя траншэі, фарміруюць кармавы запас. Многія каровы ў агракамбінаце даюць і па 28 літраў малака за суткі - вынік вышэйшы за сярэдні. Усё гэта магчыма дзякуючы і якасным кармам.
Сама касавіца працягнецца да восені. Па выніках усіх укосаў, а іх за сезон можа быць пяць, аграрыі Мінскай вобласці плануюць атрымаць больш за два мільёны тон кармавых адзінак травяністых кармоў.