Дэманструюць свой патэнцыял і рэгіёны. Экспартныя магчымасці Гомельскай вобласці становяцца шырэйшымі. Упершыню ў гісторыі айчыннай лагістыкі арганізаваны чыгуначны сэрвіс па дастаўцы ў Кітай беларускіх удабрэнняў. Усяго паўтары тысячы тон. Яны спатрэбяцца фермерам для вырошчвання кукурузы, соі, рысу, гародніны і садавіны. Груз пераадолее 7 тысяч кіламетраў.
Чжу Цзяхуэй, прадстаўнік кампаніі па перапрацоўцы імпартных удабрэнняў (Кітай):
Наша кампанія паспяхова на кітайскім рынку займаецца імпартнымі ўдабрэннямі ўжо больш як 10 гадоў. Дзякуючы дружалюбным адносінам паміж Беларуссю і Кітаем наша кампанія паспяхова завяршыла закупку і адпраўку. Жадаем даць нашым фермерам лепшае ўдабрэнне з Беларусі.
Ірына Лапіцкая, выконваючы абавязкі намесніка дырэктара Гомельскага хімзавода:
Гатовыя штомесяц грузіць па два такія кантэйнерныя цягнікі. Гатовыя разгледзець розныя маркі на адгрузку ў КНР па заяўцы спажыўца.
Гомельскі хімічны завод робіць першыя крокі ў наладжванні партнёрскіх сувязяў з Кітаем. Зацікаўленасць у павелічэнні аб'ёмаў паставак выказваюць абодва бакі. У зваротным кірунку з КНР цягнік павінен даставіць імпартную сыравіну і камплектуючыя для прадпрыемстваў Гомельскай вобласці і іншых рэгіёнаў Беларусі.
