IT-тэхналогіі, гандлёва-эканамічнае супрацоўніцтва, кааперацыя ў машынабудаванні і аграпрамысловым комплексе. Масква рыхтуецца прыняць IV Форум рэгіёнаў Беларусі і Расіі. Да падпісання рыхтуюць 60 пагадненняў. Таксама гэтымі днямі ў сталіцы Расіі пройдзе Вышэйшы дзяржсавет Саюзнай дзяржавы з удзелам прэзідэнтаў дзвюх краін. Заўтра беларускі лідар з рабочым візітам адправіцца ў Маскву. Як паведамілі ў прэс-службе Кіраўніка дзяржавы, на парадку найважнейшыя пытанні беларуска-расійскага ўзаемадзеяння. Адна з цэнтральных тэм - вынікі гандлёва-эканамічнага супрацоўніцтва за мінулы год. Бакі абмяркуюць пытанні нарошчвання адносін у машынабудаўнічым сектары і аграпрамысловым комплексе. Чакаецца і сустрэча Аляксандра Лукашэнкі з Прэзідэнтам Расіі Уладзімірам Пуціным, на якой бакі абмяркуюць найбольш важныя пытанні ўзаемадзеяння краін - як на двухбаковай аснове, так і ў інтэграцыйных фарматах, абмяняюцца меркаваннямі па тэматыцы міжнароднага парадку дня. Аб падрыхтоўцы да важнай эканамічнай і палітычнай падзеі дзвюх дзяржаў - у рэпартажы Дар'і Белавусавай-Пятроўскай.
Многія масквічы і жыхары сталіцы сёння рызыкуюць спазніцца на працу. Бо міма такіх апетытных прадуктаў прайсці проста немагчыма. Напярэдадні Форуму рэгіёнаў Беларусі і Расіі, які адбудзецца ўжо заўтра, у Маскве адкрыўся кірмаш беларускіх тавараў. Сваю прадукцыю прывезлі каля 60 найлепшых айчынных прадпрыемстваў. Шмат навінак. Напрыклад, можна паспрабаваць "італьянскую" лінейку кандытарскіх вырабаў, горкі шакалад, створаны па асаблівай рэцэптуры без цукру, а таксама набіраючыя зараз папулярнасць сярод аматараў здаровага харчавання безглютэнавыя прадукты.
Форум рэгіёнаў Беларусі і Расіі праводзяць ужо 4 год запар. На гэты раз месца сустрэчы - Масква. Тэмы форумаў заўсёды розныя. На першым, у Мінску, абмяркоўвалі развіццё АПК, на другім, у Сочы, - прамысловую палітыку.
Папярэдні, трэці, форум, яго зноў праводзілі ў сталіцы Беларусі, быў прысвечаны супрацоўніцтву ў сацыяльнай сферы. Тады ж Аляксандр Лукашэнка і Уладзімір Пуцін наведалі выставу “Белагра”, на якой свае распрацоўкі прадэманстравалі прадпрыемствы дзвюх дзяржаў. Прэзідэнты тады нават пракаціліся на сучасным аўтобусе мінскай вытворчасці. Леташні форум пабіў усе рэкорды, стаўшы самым маштабным і прадстаўнічым у гісторыі саюза дзвюх краін. У Мінск з'ехаліся ўдзельнікі з 43 суб'ектаў Расіі. Што пацвярджае рэгіянальнае партнёрства - той самы лакаматыў, здольны рухаць наперад саюзную эканоміку. Гэтым разам у цэнтры ўвагі чацвёртага форуму - інтэграцыя ў галіне высокіх тэхналогій - актуальная тэма і перспектыўная галіна.
Месцам сустрэч удзельнікаў IV Форуму рэгіёнаў Беларусі і Расіі стане Экспацэнтр - гэта адзін з самых буйных выставачных комплексаў Масквы. Зараз ідуць апошнія падрыхтоўкі, устанаўліваюцца тэматычныя секцыі, залы для перамоў, павільёны з прадукцыяй, каб ужо заўтра прадстаўнікі беларускіх і расійскіх прадпрыемстваў змаглі ярка і цікава паказаць усе свае магчымасці.
Сёння Расія - асноўны гандлёвы партнёр Беларусі. Амаль палова беларускага экспарту адпраўляецца суседзям. Наша краіна падтрымлівае прамыя гандлёва-эканамічныя адносіны з 80 рэгіёнамі Расіі. Кааперацыяй звязаныя больш як 8 тысяч прадпрыемстваў дзвюх краін. Працуюць каля 70 сумесных вытворчасцяў.
Сяргей Сідорскі, Міністр па прамысловым і аграпрамысловым комплексе ЕЭК: "Рэгіянальнае супрацоўніцтва займае вядучую ролю ў нашым эканамічным патэнцыяле прымежных раёнаў Беларусі і Расіі. Мы сёння працуем з Сахалінам, Камчацкім краем, мы працуем сёння на Далёкім Усходзе, фактычна беларускія вытворцы сёння прысутнічаюць у кожным кутку РФ. І мне здаецца, што рэгіянальнае супрацоўніцтва дало такі моцны імпульс, які не проста быў імпульсам, а стаў такой дзелавой, актыўнай працай усёй нашай эканомікі".
Гэтымі днямі Масква рыхтуецца яшчэ да адной важнай палітычнай падзеі. Падчас правядзення IV Форуму рэгіёнаў у сталіцы Расіі адбудзецца Вышэйшы Дзяржсавет Саюзнай дзяржавы з удзелам прэзідэнтаў дзвюх краін. Як адзначыў Аляксандр Лукашэнка, прымаючы на мінулым тыдні ў Мінску Дзяржсакратара Саюзнай дзяржавы, Рыгора Рапоту, пасяджэнне павінна прайсці эфектыўна і дзейсна.
Рыгор Рапота, Дзяржсакратар Саюзнай дзяржавы Беларусі і Расіі: "У прыярытэце два пытанні - гэта пытанні захавання машынабудаўнічага комплексу і супрацоўніцтва ў гэтай сферы, і прыкладна тое ж кола пытанняў, толькі па аграпрамысловым комплексе. Акрамя гэтага, ёсць яшчэ шэраг пытанняў арганізацыйнага і бюджэтнага плана. Ёсць праграмы, якія не маюць камерцыйнай каштоўнасці, навукова-даследчыя праграмы, а ёсць, якія пераламляюцца ў прамысловасці і маюць эканамічны эфект - мы рыхтавалі справаздачу па трох праграмах, і там эканамічны эфект ужо мільёны долараў, якія зарабляюць прадпрыемствы".
Выстава форуму збярэ больш як 250 беларускіх распрацовак ад 84 арганізацый. Асноўныя кірункі - гэта машынабудаванне, касмічныя тэхналогіі, IT-распрацоўкі, ахова здароўя і моладзевыя праекты. Але ў першую чаргу Форум рэгіёнаў - гэта пляцоўка для дыялогу кіраўнікоў прадпрыемстваў, губернатараў і бізнесменаў дзвюх краін. Гэта магчымасць не толькі сустрэцца і абмеркаваць сумесныя планы супрацоўніцтва, але і паставіць подпісы на кантрактах. Сёлета іх сума можа перавысіць 400 мільёнаў долараў.
