Адзіны ў Беларусі вытворца ліставога шкла павялічвае пастаўкі на еўрапейскі рынак. Гатовасць працаваць з беларускай прадукцыяй выказаў адзін з самых вядомых прадаўцоў і апрацоўшчыкаў шкла ў Еўропе - нямецкая кампанія Schollglas. Сёння ў Мінску папярэднія дамоўленасці бакоў аформілі дакументальна. Партнёры падпісалі экспартную дамову на 17 мільёнаў еўра. Цырымонія прайшла з удзелам намесніка прэм'ер-міністра Беларусі Анатоля Калініна. Чакаецца, што хутка беларускае шкло з'явіцца ў інтэр'ерах Польшчы і Германіі.
Гюнтэр Вайдэман, уладальнік кампаніі Schollglas (Германія): "Беларускае шкло зараз ужываецца ў асноўным для вырабу шклопакетаў. Але апошні час для шкляной прамысловасці становіцца ўсё цікавейшым сектар інтэр'еру. Сёння гэта ўжо палова ўсёй вытворчасці. І мы можам зрабіць вам яшчэ вельмі шмат прапаноў па развіцці сумесных праектаў у гэтай сферы".
Анатоль Чорны, Міністр архітэктуры і будаўніцтва Беларусі: "На сённяшні дзень гэта найбуйнейшы экспарцёр. Мы згортваем сёння пастаўкі ў РФ. Таму што цэны ў Расіі сёння значна ніжэйшыя. Таму перавага ў нас Еўропа і Украіна. А з іх самы буйны ў нас спажывец - гэта Schollglas, 8,5 млн кв. м шкла. Гэты самы буйны кантракт на сённяшні дзень падпісаны".
Сёлета беларускі вытворца плануе асвоіць выпуск энергаэфектыўнага шкла. За кошт новай прадукцыі аб'ёмы паставак на рынак Германіі будуць павялічаныя мінімум удвая.
