Дагаворы носяць глабальны характар і пашыраюць кааперацыйнае супрацоўніцтва паміж краінамі.
Расказвае Ілона Красуцкая.
Пакуль свет пільна сачыў за зводкамі прагнозу надвор'я ў Расіі, "Экспацэнтр" у Масква-сіці быў самым бязвоблачным месцам. IV Форум рэгіёнаў. Перамовы нон-стоп. 600 топ-менеджараў Беларусі і Расіі знайшлі агульную мову з сенатарамі, міністрамі і губернатарамі. Кантракты на сотні мільёнаў долараў. Упершыню падпісаны пагадненні паміж саветамі дэпутатаў. Ініцыятары кангрэса - верхняя палата беларускага парламента і Савет Федэрацыі Расіі. Галоўныя сенатары сёння былі нарасхват. Журналістаў цікавілі першыя вынікі і новыя праекты ў рамках саюзнай інтэграцыі.
За мінулы год у нас на 8 % выраслі прамыя расійскія інвестыцыі, склалі 3,5 мільярда даляраў. Сёння ў Расіі працуе 210 арганізацый з беларускім капіталам. Краіны звязваюць 70 міжурадавых пагадненняў. Безумоўна, за гэтым стаіць вялікая праца. У тым ліку заслуга і Форуму рэгіёнаў. Ужо 4 гады гэта перагаворная пляцоўка патэнцыяльных партнёраў дзвюх краін - можна абмеркаваць супрацоўніцтва і прама тут жа заключыць выгадныя здзелкі.
Зразумела, канчатковыя вынікі форуму пакуль падводзіць рана. Але вось некаторыя лічбы. У канцэрна "Белнафтахім" кантракт на 100 мільёнаў долараў. Такая ж сума ў нашага абутковага холдынга. Яшчэ 5 - у Баранавіцкай швейнай фабрыкі. А ўсяго па выніках маскоўскага форуму наша краіна заключыла дзясяткі такіх экспартных камерцыйных кантрактаў.
Не менш сур'ёзнымі аказаліся палітычныя дывідэнды гэтага кангрэсу. З удзельнікамі форуму інтэграцыю і кааперацыю абмеркавалі прэзідэнты Аляксандр Лукашэнка і Уладзімір Пуцін. Іх сустрэчы на форумах рэгіёнаў сталі ўжо добрай традыцыяй.
Галоўная тэма IV Форуму - супрацоўніцтва ў сферы высокіх тэхналогій. Так, за апошнія дзясяткі гадоў Беларусь праславілася ў IT-галіне.
ЕПАМ, Wargaming, Viber, "Маскарад". Нашы айцішнікі ўвайшлі ў топ-100 лепшых аўтсорсераў свету. На тыдні Аляксандр Лукашэнка анансаваў прыняцце кардынальных мер па развіцці IT-індустрыі. Размова ідзе аб прарыўным дэкрэце, які значна змяняе ўмовы працы IT-кампаній.
Увогуле, зялёнае святло для новых праектаў саюзнай IT-дзяржавы.
У Маскве нашы айцішнікі паказалі новыя праекты ў сферы Data Science (навука аб даных). Гаворачы простай мовай, з дапамогай матэматычных разлікаў гэтыя хлопцы з дакладнасцю прагназуюць поспех або правал бізнес-плана любой кампаніі.
Кіраўнік беларускай дзяржавы прапануе канкрэтныя крокі для фарміравання не толькі адзінай прамысловай, але і навуковай палітыкі ў Саюзнай дзяржаве.
Для нашай краіны пытанне прыярытэтнае, тым больш Год навукі. Даследаваннямі ў Беларусі займаюцца 26 тысяч чалавек і больш за 400 арганізацый. Сярэдні ўзрост навукоўца ў Беларусі - 46 гадоў. Час амалоджваць статыстыку.
Упершыню паўнапраўныя ўдзельнікі Форуму рэгіёнаў - юныя свяцілы беларускай навукі - дэманструюць свае распрацоўкі ў рамках новага праекта "100 ідэй для Саюзнай дзяржавы". Адзін з аўтараў - студэнт- трэцякурснік з Гомеля Максім Кір’янаў. Малады распрацоўшчык прыдумаў трэнажор для рэабілітацыі пасля інсульту. Сумясціў гумовую пальчатку з простым камп’ютарам і акумулятарам. Прыстасаванне праводзіць гімнастыку для пальцаў. Гэтая распрацоўка ў некалькі разоў таннейшая за замежныя аналагі.
З Беларуссю сёння падтрымліваюць прамыя сувязі 80 суб'ектаў Расіі. У нашай краіне з пачатку года пабывалі з дзясятак рэгіянальных дэлегацый з суседняй дзяржавы. Па словах Уладзімір Пуціна, удалося стварыць трывалы падмурак супрацоўніцтва. Абедзве дзяржавы і надалей маюць намер ісці па шляху развіцця ўсебаковага партнёрства.
Кааперацыя, інтэграцыя, інавацыі, імпартазамяшчэнне. І гэта далёка не поўны спіс тэм, якія сёння абмяркоўвалі ў Маскве. Пакуль кіраўнікі дзяржаў размаўлялі з гасцямі форуму, на стэндах спецыялізаванай выставы працягваліся актыўныя перамовы. Напрыклад, вось гэты кукурузаўборачны камбайн "Палессе" адразу з Масквы адправіцца на Кубань. Прыкладна 60 % камплектуючых - расійскай вытворчасці. А праца і тэхналогіі - беларускія. Пасля Форуму рэгіёнаў кааперацыя стане яшчэ больш цеснай.
Два дні форуму. Сотні прадпрыемстваў і распрацовак - індывідуальныя і сумесныя. Сферы - ад машынабудавання, лёгкай прамысловасці да касмічных даследаванняў. Усе вобласці Беларусі і 30 рэгіёнаў Расіі. Пераадольваючы тысячы кіламетраў, хтосьці прыязджае на форум упершыню, а хтосьці ўжо чацвёрты раз. Зрэшты, аб узаемным намеры паглыбляць супрацоўніцтва пасля самі за сябе гавораць насычаныя праграмы візітаў і запрашэнні ў адказ, якія абавязкова прымаем. Бо незалежна ад геаграфічнай аддаленасці ўсе расійскія рэгіёны для нас блізкія. Па сутнасці ўжо заўтра пачынаем падрыхтоўку да чарговай сустрэчы. Наступны Форум рэгіёнаў прыме Беларусь.
