Пра надвор'е

Сёння надвор’е на тэрыторыі Беларусі  ў асноўным вызначала зона павышанага атмасфернага ціску, толькі днём па Віцебскай вобласці адчувалася ўздзеянне малаактыўнага франтальнага падзелу. Ноччу і раніцай месцамі па краіне адзначаўся туман. Заўтра магнітных бур на тэрыторыі нашай краіны не прагназуецца. Геамагнітны фон слабаўзбураны.

19 сакавіка ў народным календары каталіцкі прысвятак Язэп. Казалі: "Як святы Язэп кіўне барадою, дык зіма ўцякае ўніз галавою". І прыкмячалі: на Язэпа добрае надвор'е - год ураджайны. Самая нізкая начная тэмпература паветра была ў Полацку ў 1963 годзе - больш за 30 з паловай градусаў марозу, а дзённы тэмпературны максімум адзначаны ў Лельчыцах у 1990 - звыш 23 градусаў цяпла.