Праекты АТН

Справа жыцця

20 сакавіка адбудзецца прэм'ера цыкла фільмаў "Справа жыцця", падрыхтаванага творчай групай Агенцтва тэленавін медыяхолдынга. 2017-ы аб’яўлены Годам навукі ў нашай краіне, і ў гледачоў тэлеканала "Беларусь 1" з'явіцца магчымасць убачыць, як перадавыя ідэі айчынных даследаванняў рэалізуюцца на практыцы і для каго гэта становіцца справай усяго жыцця.

"Справа жыцця" - дванаццаць 15-хвілінных фільмаў, дзе ў кожнай серыі распавядаецца гісторыя адной навуковай ідэі, аўтары якой вылучаныя на суісканне Дзяржаўных прэмій Рэспублікі Беларусь у галіне навукі і тэхнікі 2016 года. З панядзелка па чацвер у вячэрнім эфіры "Беларусь 1" шырокай тэлеаўдыторыі канала будуць прапанаваныя самыя яркія і неардынарныя гісторыі аб тым, як даследчыкі прыходзяць да арыгінальнай і непаўторнай ідэі, як працуюць над ёй многія гады і якім чынам рэалізуюць яе.

З новага цыкла фільмаў АТН глядач даведаецца, што над навуковай ідэяй можа працаваць цэлая група навукоўцаў - ад 3-6 чалавек да калектыву цэлага завода або інстытута. У адной з серый, напрыклад, аўтары праекта распавядуць, як калектыў ААТ "БелАЗ" ствараў самы вялізны ў свеце кар'ерны самазвал.

"Мы хацелі паказаць лёсы людзей, якія апантаныя сваёй справай, што дазволіла ім аб'яднаць імкненні на адным даследчым шляху. Менавіта такое адзінства дапамагае ўвасобіць навуковую ідэю ў жыццё. Аднак часцяком мы радуемся выніку і забываем пра канкрэтных людзей, якія за ім стаяць. Было вырашана ў Год навукі абавязкова распавесці пра гэтых людзей, каб беларусы ведалі сваіх герояў у твар", - адзначыў адзін з суаўтараў праекта "Справа жыцця" Руслан Туркоў.

Кожная серыя цыкла распавядае пра адзін з перадавых кірункаў беларускай навукі, ці то медыцына, культура, машынабудаванне, гісторыя, сацыяльная або іншыя сферы дзейнасці.

Так, першы фільм цыкла "Справа жыцця", які гледачы "Беларусь 1" змогуць убачыць 20 сакавіка ў 21:45, прысвечаны дасягненням Рэспубліканскага навукова-практычнага цэнтра трансплантацыі органаў і тканак.

Беларускі РНПЦ транспланталогіі з'яўляецца адным з найбуйнейшых у Еўропе і вядомы спецыялістам ва ўсім свеце. Ім кіруе заслужаны ўрач Рэспублікі Беларусь Алег Румо. У 37 гадоў ён упершыню ў Беларусі правёў аперацыю па перасадцы печані, а ў 45 гадоў абараніў доктарскую дысертацыю. Сёння пад кіраўніцтвам Алега Алегавіча лепшыя беларускія хірургі краіны праводзяць найскладанейшыя аперацыі па комплекснай трансплантацыі, выкарыстоўваюць у лячэнні ўласныя інструменты, алгарытмы і метады.   

Выпускi

27.03.2017
Мікраэлектроніка
23.03.2017
Лесапрамысловыя машыны
22.03.2017
Хімічная меліярацыя
21.03.2017
Прамысловае ягодоводство
20.03.2017
Трансплантацыя органаў