Тэлемарафон "Пабудуем музей разам!"

Падчас акцыі "Пабудуем музей разам!", якая праводзілася Белтэлерадыёкампаніяй у эфіры праграмы "Добрай раніцы, Беларусь!" і аднайменнага тэлемарафона на тэлеканалах "Беларусь 1" і "Беларусь-ТБ", на ўзвядзенне новага будынка Беларускага дзяржаўнага музея гісторыі Вялікай Айчыннай вайны і стварэнне экспазыцыі сабрана больш за 70 мільёнаў рублёў.

У рамках праграмы "Добрай раніцы, Беларусь!" акцыя праводзілася на працягу месяца. У эфіры праграмы штодня выходзілі відэасюжэты аб гісторыі стварэння музея, яго супрацоўніках, калекцыях і фондах, а таксама праекце новага будынка. Дзякуючы ролікам з указаннем рэквізітаў для пералічэння сродкаў, якія дэманстраваліся на працягу акцыі ў эфіры канала "Беларусь 1" і міжнароднага спадарожнікавага канала "Беларусь-ТБ", удзел у ёй змаглі прыняць усе ахвочыя, у тым ліку і беларусы, што жывуць зараз у іншых краінах - Расіі, Украіне і Прыбалтыцы. З 3 па 28 кастрычніка на разліковыя рахункі музея паступіла каля 30 мільёнаў рублёў.

29 кастрычніка тэлеканалы "Беларусь 1" і "Беларусь-ТБ" правялі аднайменную акцыю-тэлемарафон, падчас якой тэлегледачы ўбачылі спецыяльныя тэматычныя відэасюжэты, прамыя ўключэнні і спецыяльны кінапаказ, а таксама змаглі пералічыць сродкі з дапамогай тэлефоннага званка.

Такім чынам, падчас марафона і ў наступныя дні (29-31 кастрычніка) на рахункі музея было пералічана яшчэ больш за 6 мільёнаў рублёў, і больш за 40 мільёнаў тэлегледачы пералічылі пры дапамозе званкоў.

Акрамя эфірных акцый, 27 кастрычніка Белтэлерадыёкампанія на сваім інтэрнэт-партале www.tvr.by правяла анлайн-канферэнцыю з аўтарам праекта новага будынка музея - архітэктарам, лаўрэатам Дзяржаўнай прэміі Рэспублікі Беларусь, прафесарам Віктарам Крамарэнкам.

З прапановай прыняць удзел у акцыі Белтэлерадыёкампанія звярнулася да беларускіх друкаваных СМІ, якія неадкладна на яе адгукнуліся. Грошы на будаўніцтва таксама пералічылі і супрацоўнікі кампаніі.

Белтэлерадыёкампанія і надалей будзе падтрымліваць карысныя ініцыятывы і грамадска-культурныя акцыі, якія праводзяцца ў нашай краіне.